Osmani gjatë vizitës në Ukrainë: Nuk ka asnjë justifikim për bombardimet e vazhdueshme ruse mbi objektivat civile
Ministri i Punëve të Jashtme, Bujar Osmani, sot në vizitën e tij të parë në Ukrainë si kryesues i OSBE-së, dënoi sulmin rus në një ndërtesë banimi në Dnipro, ku dy ditë më parë humbën jetën mbi 40 persona dhe mbi 70 të tjerë u plagosën, transmeton Portalb.mk.
“Nuk ka asnjë justifikim nëse objektivat civile granatohen vazhdimisht. Asgjë nuk mund të justifikojë vrasjen e civilëve, pengimin e transportit ujor dhe ushqimit, pengimin e punës së autokolonave humanitare. Asgjë nuk mund të arsyetohet kur fëmijët dhe gratë shtatzëna mbeten pa ngrohje, me ushqim të pamjaftueshëm”, tha Osmani.
Osmani ka vizituar qytetin Borodyanka në rajonin e Kievit, i cili është prekur rëndë nga aksionet ushtarake.
“Në aksionet e armatosura të Rusisë u shkatërruan shkolla, spitale dhe infrastruktura e tjera shtetërore, të cilat fatkeqësisht vazhdojnë të dëmtohen apo shkatërrohen. Të gjithë ne që mbështesim Ukrainën jemi në anën e duhur të historisë, në anën e duhur të njerëzimit, duke respektuar të drejtën për jetë”, tha Osmani.
Osmani realizoi takim me Ministrin e Punëve të Jashtme të Ukrainës, Dmytro Kuleba.
“Kjo nuk është hera e parë që e vizitoj Ukrainën që nga fillimi i agresionit. Shpresoja që agresioni dhe vuajtjet do të ndaleshin përpara vizitës sime në cilësinë e Kryesusit të OSBE-së. Çdo dëshmi e re e shtëpive dhe fateve njerëzore të shkatërruara shkakton shqetësim. Duke qëndruar këtu si Kryesues i OSBE-së, i bëj thirrje Federatës Ruse që ta ndalojë këtë luftë, t’i tërheqë trupat e saj nga Ukraina, t’i përkushtohet parimeve dhe vlerave të OSBE-së dhe t’i kthehet sërish diplomacisë. Fokusi dhe prioriteti kryesor i Organizatës këtë vit do të jetë Ukraina.”, tha Osmani.
Ai theksoi se OSBE-ja do t’i vërë në dispozicion të gjitha mjetet dhe mekanizmat e saj për ta arritur këtë qëllim. Mes tjerash tha se shpreson se këtë vit do të jemi dëshmitarë të kthimit të paqes në Ukrainë.
Kryesuesi i OSBE-së, Bujar Osmani, sot në mëngjes arriti në Stacionin kryesor hekurudhor në Kiev.
Njëherazi, në kuadër të vizitës janë planifikuar takime me përfaqësues të lartë shtetëror të Ukrainës.
Vizita e Osmanit në Kiev është në suaza të realizimit të njërit prej prioriteteve kryesore të Kryesimit – gjendja në Ukrainë, me fokus të veçantë tek njerëzit në terren që janë të prekur nga agresioni ushtarak – Fjala është për njerëzit!
Ndryshe, më 1 janar 2023 zyrtarisht Maqedonia e Veriut e filloi Kryesimi i OSBE-së, organizatës multilaterale ku gjenden 57 shtete pjesëmarrëse nga Amerika e Veriut, Evropa dhe Azia kontribuojnë për paqen rajonale dhe globale.
Ministria e Punë të Jashtme ka vlerësuar që fokusi i OSBE-së gjatë udhëheqjes së Maqedonisë së Veriut do të jetë siguria e njerëzve, përkundër pasigurisë rajonale dhe globale. Më 12 janar do të shpalosen prioritet e Kryesimit të Maqedonisë së Veriut para Këshillit të Përhershëm në Vjenë.
“Nën sloganin “për njerëzit bëhet fjalë”, fokusi i presidencës së Maqedonisë së Veriut do të vendoset në sigurinë njerëzore në një epokë të pasigurisë dhe paqëndrueshmërisë rajonale dhe globale”, deklaruan ditë më parë nga Ministria.
Ministri Bujar Osmani paralajmëroi që si vend kryesues do të kontribuojnë që OSBE-ja të jetë një mision në terren, duke ndërmarrë dhe mbështetur aktivitete konkrete për lehtësimin e jetës së njerëzve. Ai vlerësoi që vendi me pjekurinë dhe njohuritë do të jetë lojtar kyç për udhëheqjen e politikave dhe proceseve ndërkombëtare.
- LEXO: Osmani – Peach: Partneriteti me Britaninë e Madhe i reflektuar edhe në mbështetjen për kryesimin me OSBE-në
- LEXO: Osmani nga Vjena: Është detyra jonë të reagojmë sot, për njerëzit – ky është themeli i OSBE-së
- LEXO: Osmani prezantoi para ambasadorëve të vendeve anëtare dhe vëzhguesve të ShBA-së prioritetet e A5
