RMV, vitin e kaluar u konfiskua 2.4 ton drogë dhe u shkatërruan 12 grupe kriminale
Në vitin 2022 janë konfiskuar mbi 2,4 ton drogë, pjesa më e madhe e të cilës ishte marihuanë, heroinë, kokainë, amfetaminë, hashash, ka njoftuar në profilin e tij në Facebook, ministri i Punëve të Brendshme, Oliver Spasovski, duke vlerësuar se viti i kaluar ka qenë i suksesshëm në luftë kundër trafikut të paligjshëm të drogës, transmeton Portalb.mk.
Sipas Spasovskit, droga e konfiskuar në tregun e zi do të kapte vlerën e gjashtë milionë eurove.
“Janë shtypur 12 grupe të organizuara kriminale të përbëra nga 51 anëtarë. U zbuluan mbi 700 vepra penale, për të cilat u raportuan mbi 800 autorë. Janë konfiskuar edhe 20 tonë prekursorë të ndryshëm, me qëllim të prodhimit të mëtutjeshëm të drogave sintetike”, informon Spasovski.
Sipas tij, vlen të përmendet sekuestrimi i një ton prekursorë në aeroportin e Shkupit, nga i cili mund të prodhohej amfetaminë në vlerë mbi 50 milionë euro.
“Në fushën e tregtisë ilegale të drogës, në vitin 2022 kemi pasur shkatërrimin më të madh të drogës së konfiskuar deri më tani, janë asgjësuar gjithsej 10 tonë drogë”, shton Spasovski.