Ukraina njoftoi për sulme të reja nga dronët rusë

Rusia nisi shumë drone gjatë natës për të sulmuar pjesë të Ukrainës dhe dhjetëra u rrëzuan, thanë zyrtarët ukrainas të hënën, transmeton Radio Evropa e Lirë (REL).

Këto sulme po vijnë pas një serie sulmesh gjatë fundjavës që vranë tre civilë në natën e Vitit të Ri.

Kryetari i bashkisë së Kievit, Vitali Klitsçko tha se 40 dronë “u nisën për në Kiev” gjatë natës, sipas forcave të mbrojtjes ajrore dhe të gjithë u shkatërruan.

Klitsçko tha se 22 dronë u shkatërruan mbi Kiev, tre në rajonin periferik të Kievit dhe 15 mbi provincat fqinje.

Objektet e infrastrukturës energjetike në kryeqytet u dëmtuan dhe një shpërthim ndodhi në një lagje të qytetit, tha kryebashkiaku.

Nuk ishte menjëherë e qartë nëse kjo ishte shkaktuar nga dronët apo municione të tjera. Një 19-vjeçar u shtrua në spital me plagë, shtoi Klitsçko.

Në rajonin periferik të Kievit, i cili gjithashtu u sulmua me dronë, u godit një “objekt infrastrukturor kritik” dhe ndërtesa banimi, tha guvernatori Oleksiy Kuleba.

Një sulm i ashpër natën e Vitit të Ri vrau të paktën tre civilë në të gjithë vendin, raportuan autoritetet ukrainase dhe u plagosën dhjetëra.

Shpërthime të shumta tronditën kryeqytetin dhe zona të tjera të Ukrainës të shtunën dhe gjatë natës. Sulmet erdhën 36 orë pas sulmeve të përhapura me raketa që Rusia nisi të enjten për të dëmtuar objektet e infrastrukturës energjetike.

Rusia ka kryer sulme ajrore mbi furnizimet me energji dhe ujë të Ukrainës pothuajse çdo javë që nga tetori, duke rritur vuajtjet e ukrainasve, ndërsa forcat e saj tokësore luftojnë për të mbajtur terren dhe për të avancuar.