MASh: Në rrjedhë është procedura për pagesën e racionit të subvencionuar të studentëve

N. D. 09:25, 20-12-2022

Urdhër pagesa e mjeteve në bazë të racionit të subvencionuar të studentëve është dorëzuar në Ministrinë e Financave për veprim të mëtutjeshëm, njoftuan nga Ministria e Arsimit dhe Shkencës, transmeton Portalb.mk.

“Komisioni në kuadër të Ministrisë së Arsimit dhe Shkencës ka bërë kontroll të aplikimeve të studentëve në aspetin e plotësimit të kushteve në përputhje me Ligjin për racion të subvencionuar të studentëve, përmes krahasimit me të dhënat e pranuara nga institucionet tjera kompetente – DAP, APRM, FSPIM, MPB dhe të gjitha universitetet”, thuhet në njoftimin e MASh-it.

Çdo student që ka plotësuar kushtet do të marrë mjete për dy muaj e gjysmë, gjegjësisht për gjysmën e shtatorit për tetor dhe nëntor.

Rikujtojmë se në thirrjen për realizimin e të drejtës së racionit të subvencionuar të studentëve, i cili ka zgjatur nga data 25 nëntor deri më 3 dhjetor, janë pranuar mbi 31 mijë aplikime.

Ndryshe, edhe pse disa herë Ministria e Arsimit dhe Shkencës (MASH) dhe kreu i institucionit, Jeton Shaqiri paralajmëruan se mjetet e para për shujtë të subvencionuar, studentët do t’i merrnin deri më 15 dhjetor, kjo procedur u shty disa ditë më vonë.

Në Kuvendin e Maqedonisë së Veriut në nëntor me 58 vota “për” kaluan propozim-ndryshimet e Ligjit për shujtat e subvencionuara të studentëve. Seanca e 91-të e Kuvendit të Maqedonisë së Veriut në rend të ditës e pat edhe votimin e ndryshimeve të Ligjit për shujtë të subvencionuara, ndryshime të cilat u abstenuan nga 21 deputetë. Ky propozim-ligj u miratua me procedurë të shkurtuar. Ligji planifikon që deri më 15 mars të vitit 2023, studentët të paguhen 120 denarë për shujtë ditore ose 2400 denarë në muaj.