Rikonstruimi i pjesës së vjetër të qytetit të Strugës ende nuk ka mbaruar, opozita kritikon se po shkatërrohet origjinaliteti i saj

Në Strugë rikonstruohet pjesa e vjetër e qytetit. Projekti i cili arrin koston e 10 milionë denarëve vlerësohet si projekt madhor nga autoritet komunale përderisa në adresë të Komunës kanë arritur kritika rreth punimeve dhe ruajtjes së origjinalitetit të pjesës së vjetër strugane nga partia opozitare “Aleanca për Shqiptarët”, shkruan Portalb.mk. Rikonstruimi ishte premtim parazgjedhor i kreut të Strugës, Ramiz Merko dhe nga vëzhgimi në terren vlerësojmë se ky premtim është në realizim e sipër.

Komuna e Strugës ka filluar rikonstruimin e pjesës së vjetër të qytetit, projekt ky i cili ishte premtim parazgjedhor i kreut aktual të Komunës, Ramiz Merko. Për redaksinë e Portalb.mk nga Komuna e Strugës thanë se ky premtim është drejt përfundimit.

“Ashtu siç ishte premtuar, filloi realizimi i rekonstruimit të rrugicave në pjesën e vjetër të qytetit dhe është drejtë përfundimit. Po kompletohen edhe dy rrugicat e fundit. Gjatë rekonstruimit u bë shtruarja me gurë e rrugëve “27 Marsi”, “Vëllezërit Miladinov” dhe “Niko Nestor” në pjesën e vjetër të qytetit. Përveç rekonstruimit, realizohet edhe ndërrimi i gypave të asbestit në sistemin për furnizim me ujë me tubacion të ri dhe lidhje e re për çdo shtëpi të kësaj lagjeje. Gjithashtu modernizohet infrastruktura tokësore e të gjitha kabllove ekzistuese.
Kjo pjesë e qytetit do të mbetet autentike ashtu siç ka qenë por duke u reksonstruuar dhe duke ofruar kushte më të mira për të gjithë”, deklaruan nga Komuna e Strugës për Portalb.mk.

Fillimin e punës rreth këtij projekti nga Komuna e njoftuan më 21 qershor të vitit 2022 ndërsa zyrtarisht punët në terren filluan më 29 qershor. Madje, fillimi i punës në rikonstruimin e pjesës së vjetër të Strugës para më shumë se 6 muajsh nga Komuna u promovua si premtim i realizuar.

Nga inspektim jonë vërejtëm se ka akoma punë për realizimin final të këtij premtimi. Punëtorët që i takuam derisa ishin duke punuar nuk dinin të na thonë se edhe sa kohë ju duhen për ti përfunduar punimet e nisura para 6 muajsh.

Në galerinë më poshtë mundet të shikoni situatën aktuale të punimeve në rikonstruimin e rrugës në pjesën e vjetër të qytetit të Strugës.

This slideshow requires JavaScript.

Më 5 korrik, teksa kreu i Komunës ndoqi nga afër punimet e shtruarjes me gurë të rrugëve “27 Marsi”, “Vëllezërit Miladinov” dhe “Niko Nestor” në pjesën e vjetër të qytetit deklaroi se “Kjo pjesë e qytetit do të mbetet autentike ashtu siç ka qenë por duke u reksonstruar dhe duke ofruar kushte më të mira për të gjithë”.

Ruajtja e autenticitetit në pjesën e vjetër të qytetit është shumë e rëndësishme sa për imazhin turistik të vendit aq edhe për aspektin historik. Përderisa kreu i Komunës së Strugës u zotua se ky projekt me vlerë rreth10 milionë denarë do të ruajë origjinalitetin e pjesës së vjetër të qytetit nga partia opozitare Aleanca për Shqiptarët – Dega Strugë, akuzojnë se në këtë projekt punojnë njerëz jo-kompetent të cilët po “mbulojnë me shtresë betoni pllakat e vjetra”.

“Kjo pjesë e qytetit do të mbetet autentike ashtu siç ka qenë por duke u riksonstruuar dhe duke ofruar kushte më të mira për të gjithë. Për Strugën që duam!”, deklaroi kreu i Komunës së Strugës, Ramiz Merko, gjatë një inspektimi të punimeve në pjesën e vjetër të qytetit më 5 shtator.

“Si person kompetent për këto çështje, por edhe të gjithë qytetarët e vjetër të qytetit të Strugës, besoj se e kanë të qartë se çfarë do të thotë autencitet i vërtetë i pjesës së vjetër të qytetit, rrugë me pllaka karakteristike të gurit, me elemente plotësuese urbane, dhe se nuk ka të bëjë asgjë me atë që ju i këtheni copat gurit ekzistues në shtresë të betonit të armuar, ose ndryshoni pozitën e gurëve ekzistues në shtresë të re betoni dhe i rehabilitoni gypat e çimentos së azbestit të ujësjellësit, me gypa të ri. Autenticiteti i pjesës së vjetër të qytetit dhe rrugëve të vjetra me pllaka të gurit, realizohet me projekte dhe plane zbatuese të detajuara, mirë të menduara nga Ente dhe persona profesional, për çdo segment dhe çdo hapësirë përkatëse të rrugës, në pjesët më të imta dhe sipërfaqet minimale me përmbajtje specifike”, tha Lulzim Nasufi, kryetar i ASH – së, dega në Strugë.