Me bomba të rreme kundër arsimit: Ndërprerjet e shpeshta të mësimit krijojnë gjenerata të dëmtuara

N. D. 12:36, 23-11-2022

Student, shtëpi studentore. Foto: Portalb.mk/Arbnora Memeti.

Gjatë periudhës së pandemisë COVID-19, bankat e shkollave u zëvendësuan me monitorë për më shumë se një vit, ndërsa shtëpitë u kthyen në klasa. Mësimi klasik u ndërpre detyrimisht, gjë që ishte një sfidë e vërtetë si për nxënësit, ashtu edhe për stafin pedagogjik. Në periudhën e kaluar sërish ka pasur ndërprerje më të gjata në mësim, ku nxënësit prej disa ditësh nuk janë në shkollë për shkak të raportimeve të rreme për bomba të vendosura, shkruan Meta.mk, transmeton Portalb.mk.

Si ndikon ndërprerja e rrjedhës normale të procesit mësimor te të rinjtë dhe arritjet dhe njohuritë e tyre dhe çfarë dëmi shkaktojnë në afat të gjatë ndërprerjet e tilla në mësimdhënien e rregullt. Për këtë temë Meta.mk bisedoi me profesoren Elizabeta Sekirarska nga shkolla e mesme “Pero Nakov” në Kumanovë. Ajo punon në sektorin e arsimit për më shumë se 30 vjet, por gjithashtu zbaton metoda dhe teknika moderne në mësimdhënie, si dhe punon si trajnere dhe zhvilluese e mjeteve kompjuterike për punë në lëndë.

“Ndërprerjet në procesin e mësimdhënies krijojnë të rinj të cilët nuk munden që në mënyrë të mjaftueshme të përvetësojnë materialin dhe kjo reflektohet në nivelin e njohurive dhe të kuptuarit të asaj që mësohet. Dhe kjo është shumë e dukshme”, thotë Sekirarska.

Sipas saj, efekti i sistemit të të mësuarit nga shtëpia, nën mbikëqyrjen dhe praninë e familjarëve, në një hapësirë të kufizuar të përbashkët dhe jo kudo me burime të pakufizuara, është një situatë stresuese. Këto ditë, ndjenja të tilla të pasigurisë, frikës përsëriten tek të rinjtë për shkak të lajmërimeve të rreme për bomba të vendosura në shkollat e mesme të Shkupit, për çka mësimi edhe njëherë u ndërpre.

“Efekti i kërcënimeve të tilla serioze ndaj nxënësve është i fortë. Shtrohet pyetja se çfarë nënkuptojnë për shëndetin e tyre mendor dhe krijimin e aspekteve serioze të jetës së tyre në kushte frike dhe paniku. Kjo formë e sulmit kibernetik është padyshim pjesë e pasqyrës më të madhe, në të cilën fëmijët, për fat të keq, janë sërish vetëm dëm kolateral dhe pjesë e enigmës, e cila për të gjithë ne, për shkak të kujdesit ndaj tyre si prindër dhe mësues, është më vështir”, shpjegon profesoresha.

Sipas saj, të dyja situatat janë të lidhura me një fije të pashmangshme: situata në të cilën fëmijët vendosen jashtë shkollave, si ajo hapësirë bazë mësimore në të cilën ata rriten dhe piqen dhe që ata e njohin si pjesë të mësimit dhe miqësisë, të cilat duhet të jenë të pandërprerë.

“Bëhet fjalë për breza që përballen me disa nga përfitimet e dhimbshme të epokës së re dhe për fat të keq, po, ata mund të dallohen si breza të dëmtuar që mësojnë jetën përmes rrethanave që ngjallin frikë dhe panik dhe nuk lënë hapësirë tjetër për manipulime jetësore përveç përshtatjes – edhe si nxënës edhe si të rinj, për të cilët jeta në këtë fazë duhet të duket ndryshe”, shton profesoresha.

Në këto situata, ndikimi i prindërve është shumë i rëndësishëm, ata duhet t’ua interpretojnë fëmijëve situata të tilla ashtu siç janë në të vërtetë dhe t’i drejtojnë ata të jenë të vëmendshëm, bashkëpunues dhe serioz. Sipas Sekirarskës, në kuptimin pedagogjik, shumë i madh është ndikimi i mësuesve, të cilët fëmijëve duhet t’ua lehtësojnë sfida të tilla, të shpërndajnë qetësi dhe të bëjnë përpjekje për t’u vënë në dukje se edhe në kushte krizash të llojeve të ndryshme dhe me intensitet të ndryshëm, ata janë këtu për ta.

“Kjo detyrë si për prindërit ashtu edhe për mësuesit nuk është e thjeshtë, sepse rrethanat e vështira, plot pasiguri dhe frikë reale se çfarë mund të ndodhë, janë pikërisht ato me dhe në të cilat jetojnë fëmijët sot. Vetëm vetëdija se kanë nevojë për ndihmë dhe mbështetje në kuptimin psikologjik, pedagogjik, mund t’i ndihmojë që të përballojnë më lehtë barrën e kohës në të cilën po formohen si njerëz”, thotë ajo.

Muajin e kaluar, një duzinë shkollash të Shkupit morën gjithsej tetë raportime të rreme për bomba të vendosura, pas së cilës ato u evakuuan dhe policia kreu kontrolle antiterrori. Studentët nuk kishin mësim. Të gjitha raportimet u vërtetua se ishin të rreme.

Raportet dorëzohen rregullisht të mërkurën, të enjten ose të premten gjatë javës, dhe siç konfirmoi ministri i Punëve të Brendshme, Oliver Spasovski, si dhe drejtorët e shkollave, në shënjestër janë të njëjtat turne të nxënësve.

Agjencia e lajmeve Meta ka mundur të marrë kopje të përmbajtjes së shumicës së kërcënimeve të rreme me bombë. E fundit, e cila u dërgua saktësisht një javë më parë, ndryshonte nga ato parapraket në atë që dërguesi kërkonte ryshfet për të mos shpërthyer bombën.

Alarmi i parë fals për bombë u dërgua në shkollat e mesme të Shkupit më 26 tetor (e mërkurë).

Pas raportimeve të rreme dhe humbjes së mësimit, drejtuesit e shkollave ishin në pritje të udhëzimeve nga MASh se si të punonin dhe të kompensonin mësimin e humbur. Përgjegjësit në Ministrinë e Arsimit dhe Shkencës kanë lëshuar një deklaratë në të cilën kanë porositur shkollat që deri në fund të gjashtëmujorit të parë, pra deri në Vitin e Ri të gjejnë mënyrën dhe të plotësojnë mësimet e munguara.

Edhe pse ministri Spasovski ka paralajmëruar se rasti do të zbardhet së shpejti, ende nuk dihen detaje se kush po e prish procesin arsimor dhe po mbjell frikë tek nxënësit, prindërit dhe mësimdhënësit e tyre, si dhe në mbarë shoqërinë.