Osmani: Do t’i propozoj Qeverisë që ligji për shoqatat të dërgohet në Komisionin e Venecias që të përcaktohet nëse është i kontestueshëm apo jo

N. D. 11:53, 08-11-2022

Duke komentuar vërejtjet për ndryshimet ligjore të miratuara nga Kuvendi i Maqedonisë, me të cilat ndalohen shoqatat dhe partitë në vend që të mbajnë emra fashistë, ministri Bujar Osmani njoftoi se do t’i propozojë Qeverisë që amendamentet ligjore t’i dërgohen Komisionit të Venecias për të përcaktuar nëse ka ndonjë element kontestues në ligje, transmeton Portalb.mk.

Në konferencën e përbashkët për media me homologun e tij bullgar, ministrin e Punëve të Jashtme të Bullgarisë, Nikollaj Milkov, Osmani tha se këto ndryshime ligjore të miratuara nga Kuvendi kanë për qëllim reagimin dhe parandalimin e sabotimeve të mundshme të komuniteteve nga palët e tjera.

“Por po them publikisht se disa çështje në vetë ligjin që janë kontestuese, do t’ia sugjeroj Qeverisë që ta dërgojë ligjin në Komisionin e Venecias që të tregojë nëse ka elementë që kontestohen në atë ligj apo jo”, tha Osmani.

Osmani përshëndeti iniciativat e institucioneve kompetente për forcimin e bashkëpunimit në fushën e kulturës ndërmjet dy vendeve përmes qendrave zyrtare kulturore dhe informative në Shkup dhe Sofje dhe theksoi se kjo është rruga e duhur për promovim kulturor dhe social.

“Këtë e konsideroj veçanërisht të rëndësishme sepse në periudhën e kaluar kemi qenë dëshmitarë se si keqpërdoren këto tema dhe krijohen ngjarje të pakëndshme përmes manipulimit të ndjenjave të qytetarëve, qëllimi përfundimtar i të cilave është rrëmbimi i aktiviteteve të dy vendeve për promovimin e marrëdhënieve të mira fqinjësore”, tha Osmani.

Në këtë drejtim, duke iu përgjigjur pyetjeve të gazetarëve se a do të hapet qendër zyrtare kulturore maqedonase në Bllagoevgrad, Osmani tha se në lidhje me këtë çështje, MPJ-të e dy vendeve duhet të udhëheqin bashkëpunimin, në mënyrë që, siç ka përsëritur ai, të mos lejojnë të tjerët të zgjidhin axhendën dhe të na imponojnë axhendën e tyre.

“Prandaj, jo rastësisht përmenda se qendrat kulturore dhe informative në Shkup dhe Sofje janë mënyra se si duhet të ndahen kulturat mes dy vendeve. Sigurisht që qytetarët kanë të drejtë të bashkohen në çdo bazë, por kjo duhet të jetë në frymën e miqësisë, bashkëpunimit dhe fqinjësisë së mirë. Pikërisht këtë duam ta promovojmë”, tha ministri Osmani.

Deputetët e qeverisë dhe të opozitës së fundi votuan pa asnjë votë kundër apo abstenim me 67 vota “për” ndryshimet në Ligjin për shoqatat dhe fondacionet, të paraqitura nga VMRO-DPMNE dhe Ligjin për Partitë Politike, të dorëzuara nga LSDM, me të cilat ndalohet që shoqatat dhe partitë të mbajnë emra fashistë.

Ndryshimet ligjore të propozuara nga të dyja palët pasuan hapjen e klubeve bullgare në vend me emrat “Vanço Mihailov” më 16 prill në Manastir dhe “Car Borisi i Tretë” më 7 tetor në Ohër.

Me ndryshimet e miratuara, të gjitha shoqatat dhe fondacionet e krijuara deri më tani, si dhe partitë politike, kanë afat prej tre muajsh për t’iu përmbajtur ndryshimeve të reja ligjore.