RMV, mbi dy mijë vende të reja pune u hapën në 10 muaj

Analiza mujore e Drejtorisë për Zonat e Zhvillimit Industrial Teknologjik tregon se mbi dy mijë vende të reja pune u krijuan në dhjetë muajt e parë në kompanitë e Zonave Industriale Teknologjike dhe numri i të punësuarve u ngjit për herë të parë mbi 16.000, transmeton Portalb.mk nga 360 Gradë.

Sipas të dhënave të publikuara nga Drejtoria, kjo është një rritje prej 16 për qind në një vit dhe vetëm në tetor janë hapur gati 500 vende të reja pune.

“Tendenca pozitive e rritjes që nga fillimi i vitit vazhdon në drejtim të eksporteve dhe importeve. Deri në tetor, eksportet nga Drejtoria janë rritur në 3.122 miliardë euro, duke tejkaluar kështu nivelin e eksporteve të vitit të kaluar prej 3 miliardë eurosh në një vit, që ishte nivel rekord deri tani që nga ekzistenca e zonave. Nga analiza rezulton se eksportet në 10 muajt e parë të vitit janë 26 për qind më të larta se në vitin 2021, pra 50 për qind më të larta krahasuar me të njëjtën periudhë të vitit 2020″, thuhet në analizë.

Nga fillimi i vitit importet janë rritur për 15 për qind krahasuar me vitin e kaluar dhe arrijnë në 2.806 miliardë euro. Krahasuar me vitin 2020, megjithatë, rritja është me 43 për qind.

Sipas analizës, tendencat pozitive ekonomike janë rezultat i efekteve të konceptit të ri të Zonave të Zhvillimit Industrial Teknologjik dhe ky trend pozitiv pritet të vazhdojë deri në fund të vitit.

Analiza ndër të tjera thekson se që nga fillimi i zbatimit të këtij koncepti, në 20 muajt e fundit janë arritur kontrata mbi 620 milionë euro dhe duhet të sjellin mbi 5000 vende të reja pune.