Johnson: Putin mendon për Ukrainën njësoj si Millosheviqi për Kosovën
Ish-kryeministri britanik, Boris Johnson, në një intervistë për “Sky News”, ka krahasuar presidentin rus Vladimir Putin me ish-presidentin serb, Sllobodan Millosheviq, transmeton Portalb.mk.
Këtë konkluzion Johnson e ka nxjerrë në bazë të një eseje që Putin shkroi për Ukrainën, e cila u lexua në qeverinë britanike, në të cilën ai gjykoi se presidenti rus kishte bërë një gabim katastrofik.
“Mendoj se Putini bëri një gabim katastrofik. Ne në qeverinë britanike kemi lexuar esenë e tij mbi Ukrainën nga viti i kaluar. Ai ishte thelbësisht i gabuar për atë që është Ukraina. Ishte sikur të lexoje Sllobodan Millosheviqin për temën e Kosovës. Sllobodani mendonte se Kosova është pjesë përbërëse e Serbisë së madhe dhe shtëpi shpirtërore e kombit serb. Mendoj se kështu mendon Putini për Kievin dhe origjinën e besimit ortodoks. Dhe ky është një gabim i plotë. Ukraina është kulturë e lirë dhe e pavarur evropiane me identitetin, ambiciet, fatin e saj dhe ai (Putini) bëri gabim thelbësor”, thotë Johnson në një intervistë ekskluzive për Sky News.
Duke folur për temën e luftës në Ukrainë, ish-kryeministri britanik tha gjithashtu se nuk mendon se Putini do të përdorë armë bërthamore.
“Mendoj se nuk do ta bëjë një gjë të tillë. Do të ishte i çmendur po ta bënte këtë… Një akt i tillë do të thoshte që Rusia të tërhiqet nga klubi i vendeve të qytetëruara në të njëjtën sekondë. Do të ishte një fatkeqësi e plotë për Rusinë, ekonomia e së cilës do të ngrihej menjëherë”, tha Johnson.
