RMV, Qeveria mori vendim për disa kategori bursash për nxënësit e shkollave të mesme

Qeveria në seancën e djeshme ka marrë vendim për përcaktimin e numrit të bursistëve dhe masës së bursave për nxënësit e regjistruar në shkollat ​​e mesme për vitin aktual akademik, transmeton Portalb.mk.

Sipas vendimit, bursa në vlerë prej 3.500 denarë në muaj janë paraparë për: nxënësit e talentuar – sportistë, nxënësit e talentuar nga fusha e shkencave natyrore dhe teknike, nxënësit e talentuar në fushën e arteve, nxënësit me nevoja të veçanta, nxënësit e kategorive sociale, nxënësit pa prindër, nxënësit që zbatojnë programe mësimore në profesionin e hotelerisë dhe turizmit, për kurrikulat nga profesioni elektroteknik, nga profesioni i ndërtimit dhe gjeodezisë, nga profesioni bujqësor-veterinar, për kurrikulat e inxhinierisë, nga profesioni i tekstilit dhe lëkurës, nxënësit që zbatojnë kurrikulat dhe programet për aftësimin profesional dhe arsimin profesional në kohëzgjatje trevjeçare, nxënësit që do të regjistrohen në klasat e arsimit profesional, në të cilat mësimi praktik do të realizohet me një numër të shtuar orësh, sipas programeve të arsimit profesional.

Për nxënësit romë, janë paraparë bursa prej: 2200 denarë në muaj, për nxënësit që kanë notë mesatare prej 4,50 deri në 5,00. 1500 denarë në muaj për nxënësit me notë mesatare prej 3,50 deri në 4,49. 1200 denarë në muaj për nxënësit me notë mesatare prej 3,00 deri në 3,49 dhe 800 denarë në muaj për nxënësit romë që kanë notë mesatare prej 2,00 deri në 2,99.

Ministria e Arsimit dhe Shkencës njoftoi se pret që deri në fund të këtij muaji të shpallen konkurset për bursa studentore.