RMV, filloi regjistrimi për vaksinim falas kundër gripit sezonal për grupet e rrezikuara
Nga sot përmes ueb-faqes vakcinacija.mk filloi regjistrimi për vaksinim falas kundër gripit sezonal për grupet e rrezikuara të popullsisë. Kështu njoftoi për mediat Ministria e Shëndetësisë pas pyetjeve nga Portalb.mk. Nga Ministria nuk kanë ende evidenca për situatën reale në terren me rastet e gripit sezonal.
Vaksinimi falas kundër gripit sezonal është opsional, ai është i destinuar për grupet e rrezikuara si: të moshuarit mbi 65 vjeç, personat me sëmundje kronike, punonjësit shëndetësorë, gratë shtatzëna, fëmijët nga 6 muaj deri në 5 vjeç.
Qytetarët që bëjnë pjesë në grupet e rrezikuara mund të shprehin interesin e tyre duke plotësuar aplikacionin në këtë LINK.
“Duke plotësuar aplikacionin, ju regjistroheni për vaksinim direkt në sistemin My Termin. Sipas orarit të parashikuar në planin e vaksinimit, do të njoftoheni me SMS porosi për datën, orën dhe vendin e saktë se kur duhet të vaksinoheni”, thanë nga Ministria.
Bëhet fjalë për vaksinë kundër katër llojeve të gripit sezonal, e prodhuar nga kompania Abbott nga Holanda.
Ndryshe, vaksinimi kundër gripit sezonal është masa më efektive për parandalimin e gripit, i cili parandalon shfaqjen e formave më të rënda, ndërlikimet dhe përfundimet fatale, veçanërisht në grupet e rrezikut.