fbpx

Shqipëria e Kosova që sot me sistem unik arsimor

Në fjalën e tij, kryeministri i Shqipërisë Edi Rama ka vlerësuar se kjo marrëveshje shënon vendosjen e gurthemelit për arsimin e përbashkët Shqipëri-Kosovë dhe ka bërë thirrje për nisjen sa më parë të punës.

“Punën që do bëhet për arsimin duhet ta shfrytëzojmë për të bashkuar forcat dhe eksperiencat drejt europianizimit të arsimit. Hapat drejt një unifikimi të sistemit arsimor nuk janë një lëvizje drejt bashkimit mekanik, por një ecje e përbashkët drejt asaj çka duam të kemi nesër për gjeneratën tjetër të shqiptarëve”, ka thënë Rama.

Ai është shprehur se, kjo lëvizje unifikimi do të sjellë një cilësi të re të dijes dhe hapjen e kantiereve të përbashkëta të punës.
“Gjithashtu, kjo lëvizje nis në një kohë kur këmbanat e alarmit bien fort për mësimin dhe shqipen”, ka shtuar kryeministri Rama.

Ndërsa ministrja e Arsimit e Shqipërisë, Lindita Nikolla, duke e cilësuar si ditë historike e emocionuese nënshkrimin e marrëveshjes, ka thënë se ambicja është që unifikimi i kurrikulave të nisë nga zbatimi që shtatorin e ardhshëm.

“Të punojmë që ky unifikim të nisë nga zbatimi këtë shtator. Korniza që unifikuam bën që studentët kosovarë ta vijojnë arsimin në Shqipëri e anasjelltas”, ka thënë Nikolla.

Gjithashtu, ka nënvizuar ajo, dy qeveritë do bëjnë të mundur që studenti të vijojë studimet edhe në vendet e BE.”Një epokë e re fillon për arsimin shqiptar”, ka vijuar ministrja, për të shtuar se sistemi arsimor shqiptar do të jetë si ai i Kosovës, 5 plus 4 plus 3.

Nënshkrimi i marrëveshjes është përshëndetur edhe nga ministri kosovar i Arsimit, Ramë Buja, i cili ka komentuar se Kosova dhe Shqipëria janë bashkë në dije.”Përgëzoj këtë pjesë të rrugës sonë që ne realizuam sot. Ne po i japim njëri-tjetrit dhe kjo është çështja. Jam shumë i gëzuar dhe mirënjohës për ata që punuan”, ka thënë ai.

Tags

Lajme të ngjashme

Back to top button
Close