Studim, nga RMV ikin punëtorët pasi ka mospërputhje të kërkesës së tregut dhe mungesë të perspektivës për të rinjtë

Sot në Shkup gjatë një platforme shkëmbimi dhe panel diskutimi të nivelit të lartë u prezantua studimi “Migracioni i fuqisë punëtore në Ballkanin Perëndimor: Modelet e hartëzimit, adresimi i sfidave dhe korrja e përfitimeve” i mbështetur nga Zvicra dhe Austria dhe i përgatitur nga Organizata Ekonomike për Zhvillim dhe Bashkëpunim, njofton Portalb.mk.

Politikëbërës dhe opinionisë, përfaqësues të sektorit privat dhe ekspertë u bashkuan për të kuptuar më mirë tendencat, modelet dhe pasojat e migracionit të fuqisë punëtore dhe gjetjen e shtigjeve për zhvillimin socio-ekonomik të Maqedonisë së Veriut.

Zëvendëskryeministri i ngarkuar me Çështjet Ekonomike, Fatmir Bytyqi, së bashku me ambasadoren e Zvicrës në Maqedoninë e Veriut, Véronique Hulmann, ambasadorin e Austrisë në Maqedoninë e Veriut, Georg Woutsas, dhe Anita Richter, ushtruese e detyrës së shefes së Divizionit të Evropës Juglindore të OECD-së, hapën konferencën duke theksuar se tendenca kryesore në pasojat e migracionit të punës të Maqedonisë së Veriut është mospërputhja midis kërkesës së tregut të punës në Maqedoninë e Veriut dhe mungesa e perspektivave për të rinjtë.

Në panel diskutim morën pjesë ministri i Arsimit dhe Shkencës, Jeton Shaqiri, Viktor Mizo, drejtor i Kostal dhe kryetar i Shoqatës së Kompanive të Huaja me Prodhim të Avancuar Teknologjik të Këshillit të Investitorëve të Huaj, Nena Mançev, menaxhere e Programit të Lidershipit dhe Edukimit në Maqedoni2025, dhe Sofija Daceva, një grua e re që ka studiuar jashtë vendit dhe themeloi biznesin e saj “Wice” në Maqedoninë e Veriut.

Panelistët u pajtuan se sfidat kyçe që duhet të adresohen nga hartuesit e politikave kanë të bëjnë me tejkalimin e hendekut midis kërkesës së tregut të punës dhe sistemit arsimor, me përmirësimin e klimës së investimeve për të inkurajuar më tej investimet e huaja të drejtpërdrejta nga diaspora dhe me zhvillimin e stimujve për talentet e reja që të kthehen në Maqedoninë e Veriut pas trajnimeve dhe studimeve jashtë vendit.

Raportin mbi  migracionin e fuqisë punëtore mund ta gjeni këtu dhe shënimin për Maqedoninë e Veriut mund ta gjeni këtu.