Siria voton në zgjedhjet presidenciale

Populli sirian do të votojë të martën në zgjedhjet presidenciale nën masa të rrepta sigurie dhe nën kërcënimin e rebelëve, të cilët janë zotuar se do të prishin procesin.

Presidenti Bashar al-Assad pritet gjerësisht të fitojë një mandat të tretë 7-vjeçar, por kjo është hera e parë në këtë dekadë që ai do të ketë 2 kundërshtarë.

Dy kandidatët e tjerë Maher Hajjar dhe Hassan al-Nuri nuk janë shumë të njohur, por megjithatë kanë zhvilluar një fushatë të barabartë me presidentin aktual.

Fushata zgjedhore përfundoi zyrtarisht të hënë, punëtorët nëpër Damask hoqën posterat e kandidatëve.

Kryeministri Wael el-Halqi i cilësoi

zgjedhjet si një ditë historike për Sirinë dhe se ‘pjesëmarrja e madhe do t’i provojë të gjithë botës se populli sirian është i vendosur për të realizuar një proces të suksesshëm’. Ai i bëri thirrje sirianëve të zgjedhin një president, i cili do të rikthejë sigurinë dhe stabilitetin në vend.

Sipas Ministrisë së Brendshme siriane numri total i votuesve është 15 milionë e 800 mijë, brenda dhe jashtë vendit. Ndërkohë që do të votohet në 9 mijë 600 qendra votimi, të vendosura vetëm në zonat e kontrolluara nga qeveria.

Kreu i Koalicionit Kombëtar Sirian, Ahmed Al- Jarba i ka përshkruar zgjedhjet si “teatër i shkruar me gjakun e sirianëve”, Ai ka akuzuar Assad-in se ka planifikuar të bombardojë qendrat e votimin dhe më pas të fajësojë opozitën.
/ Top Channel