Bekteshi: Po bëjmë përpjekje që t’u ndihmojmë shkollave të kenë ngrohje dhe mësim të rregullt

Po bëhen përpjekje që të ndihmohen shkollat fillore dhe  të mesme dhe mësimi në periudhën e dimrit të mbahet me prezencë fizike, deklaroi sot ministri i Ekonomisë, Kreshnik Bekteshi në intervistë për TV Sitel, transmeton Portalb.mk.

“Ajo është kompetencë e komunave, por fëmijët kanë humbur shumë gjatë kohës së covid-pandemisë dhe tani për shkak të krizës energjetike, më mirë t’i ndihm ojmë shkollat se sa t’i lëmë fëmijët të humbasin shumë. Konsumi për pesë muaj, nga nëntori deri në mars, për të gjithë shkolat në nivel shtetëror është rreth 10 gigavat në orë dhe atë mund ta sigurojmë përmes EMV-së dhe jam i bindur se do të gjejmë zgjidhje”, tha Bekteshi.

Sipas vleerësimeve të tij, shkollat nuk do të duhej të kenë problem deri në fund të marsit.

Ai vlerëson se, është joserioze që 2,487 subjekte juridike në shtet ende nuk kanë lidhur marrëveshje për furnizim me energjinë elektrike. Prej tyre, 60 përqind janë nën kompetenca të pushtetit lokal.

“Nuk është në rregull që të lihen shkollat pa furnizues me energji elektrike sepse  kur nuk ke furnizues me energji elektrike, ndërsa në bursë çmimi është 400 euro, në mënyrë automatike duhet të paguajnë 600 euro që të mos lihen objektet e pafurnizuar me energji elektrike. Të gjitha subjektet juridike i kanë ditur afatet kur u skadojnë marrëveshjet”, theksoi Bekteshi.

Nga 1 shtatori 2022 e deri më 31 mars 2023 në Maqedoni do të vlejnë masat për kursim të energjisë elektrike, me të cilat konsumi duhet të zvogëlohet për 15 për qind, me synim – “Kursimi i energjisë elektrike për dimër të sigurt”.

Nga Qeveria njoftuan se do të zvogëlohet marzha e furnizuesit me energji elektrike nga 50 në 20 për qind.

Paraprakisht nga Qeveria bënë thirrje që të respektohen masat për kursimin e energjisë elektrike dhe njoftuan se për përballimin e krizës energjetike janë siguruar mbi 100 milionë euro.