Nuk ka endoproteza për kofshët dhe gjunjët, pacientët të indinjuar presin operacionet: Spitali “8 Shtatori” pret që FSSh të miratojë paratë për blerje

Një pjesë e pacientëve që duhet t’i nënshtrohen operacionit në kofshë ose në gju, përballen me problem, pasi endoprotezat janë harxhuar në Spitalin “8 Shtatori”. Ata thonë se duhet të presin disa muaj për operacion, por për disa prej tyre gjendja është urgjente dhe thjesht nuk kanë kohë të presin përfundimin e procedurës së tenderit për blerjen e një sasie të re endoprotezash, shkruan Faktor, transmeton Portalb.mk.

“Kanë kaluar disa vite që nga operacioni im i kofshës dhe mjekët specialistë rekomandojnë që të bëhet një zëvendësim sa më shpejt të jetë e mundur. Prandaj, duke u bazuar në faktin se Spitali i përgjithshëm i Qytetit në Shkup, SPQ “8 Shtatori” ka vërtet ortopedë të shkëlqyer, caktova termin në atë institucion shëndetësor. Fatkeqësisht, pas ekzaminimeve dhe konsultave, më njoftuan se nuk ka endoprotezë, gjegjësisht se shuma e ngarkuar me FSShM-në është përdorur dhe pritet një sasi e re, por pas përfundimit të tenderit. Operacionin më kanë ofruar ta bëj privatisht dhe kushton rreth 1700 euro dhe vetëm për një kofshë. Nuk mundem, gjegjësisht nuk duhet të pres, sepse gjendja ime shëndetësore mund të përkeqësohet papritur dhe të çojë në paaftësi të përhershme. Më duhet ende të bëj konsulta në institucione të tjera shëndetësore dhe sigurisht opsioni i fundit është të marr kredi dhe të bëj operacionin për 1700 euro për kofshë. Vërtet pyes veten për sa kohë do të zhytet shëndeti publik në Maqedoni. Privatisht çdo gjë është e mundur, por për ne të siguruarit që rrogat shkojnë rregullisht në FSSh, një herë në jetë kur na duhet diçka e tillë nuk ka”, thotë një paciente 45-vjeçare nga Shkupi, e cila ka nevojë urgjente për të zëvendësuar endoprotezën e vjetër të kofshës, dhe e cila ka diskutuar rastin e saj me Faktor.

Faktor kërkoi përgjigje nga udhëheqësia e SPQ “8 Shtatori” dhe sipas deklaratave të drejtorit, dr. Hristijan Kostov, endoprotezat vërtet janë harxhuar para fundit të këtij viti, para së gjithash për shkak të numrit të madh të pacientëve. Njëkohësisht ai tregon se në muajin gusht i janë drejtuar Fondit të Sigurimeve Shëndetësore dhe kanë kërkuar mjete shtesë financiare për blerjen e materialeve të nevojshme.

“Është e vërtetë që endoprotezat janë harxhuar dhe procedura e tenderit është në vazhdim. Nëse dikujt i ofrohet të bëjë operacion privatisht, do të thotë se bëhet fjalë për aktivitet shtesë. Por ne nuk i ndajmë protezat në private apo barrën e fondit, ose ka endoproteza ose nuk ka. Problemi është se sivjet i shpenzuam për vetëm tetë muaj, kryesisht për shkak të fluksit të pacientëve. Për shkak të pandemisë Covid, pacientët që nuk kishin urgjencë për operacione të tilla kirurgjikale nuk u operuan. Por, pasi gjithçka filloi të funksiononte normalisht, ndodhi që brenda pak muajsh të kishte një numër të madh pacientësh, për shkak të të cilave endoprotezat u harxhuan. Presim përgjigje nga FSShM për miratimin e fondeve për blerjen e sasive të reja. Të njëjtat para që kemi planifikuar për këtë prokurim të veçantë për endoproteza të paktën në pesë vitet e fundit, mjaftuan për një vit të tërë që i shpenzuam gjatë verës për shkak të fluksit të pacientëve siç thashë. Ndryshe, një endoprotezë për kofshë është afërsisht 1200 euro, për gju është edhe më e shtrenjtë, diku rreth 2 mijë, 2 mijë euro e gjysmë. Bëhet fjalë për endoprotezat më cilësore amerikane dhe gjermane. Një numër i madh i pacientëve me infeksione të endoprotezave insistojnë të operohen në SPQ “8 Shtatori” ku duhet të ndërrohen dhe një protezë e revizionuar kushton deri në 20 mijë euro. Janë rreth 30 pacientë të tillë. Mjetet nuk janë miratuar, pritet përgjigje nga FSShM”, thotë drejtori Kostov.

Në letrën drejtuar FSSh, nga ky institucion shëndetësor theksojnë se nëse nuk sigurohen me kohë mjete shtesë për prokurimin e endoprotezave, operacionet nuk do të mund të kryhen dhe listat e pritjes së pacientëve do të rriten edhe më shumë.