Zelenski: Në shtator çliruam territor prej 6.000 kilometrash katrorë
Forcat ukrainase kanë çliruar rreth 6,000 kilometra katrorë territor në një kundërofensivë këtë muaj, tha Presidenti Volodymyr Zelensky dhe kërkoi ndihmë të re në sistemet kundërajrore nga vendet perëndimore. Ai tha se ushtria ukrainase vazhdon të përparojë në lindje dhe jug të vendit, kështu që rusët tani kontrollojnë vetëm një pjesë të vogël, lindore të rajonit Kharkiv, transmeton Portalb.mk.
Rusia pranoi se kishte humbur qytetet kryesore në Ukrainën verilindore, por e përshkroi atë si një tërheqje të trupave për t’u rigrupuar dhe fokusuar në rajonet lindore të Donetsk dhe Luhansk.
Sekretari amerikan i Shtetit, Anthony Blinken, tha se forcat ukrainase kishin bërë përparim të konsiderueshëm në kundërsulmin e tyre, por shtoi se ishte shumë herët për të parashikuar rezultatin.
“Që nga fillimi i shtatorit, ushtarët tanë kanë çliruar një territor prej mbi 6000 kilometra katrorë në lindje dhe jug. Lëvizja e trupave tona vazhdon”, tha Zelensky në fjalimin e tij të natës, pa specifikuar se cilat fshatra dhe qytete u çliruan.
Ushtria ruse ka konfirmuar se është tërhequr nga Balaklia, Kupyansk dhe Izyum. Inteligjenca ukrainase tha se Moska kishte zëvendësuar komandantin e grupit të ushtrisë perëndimore, gjeneralin Roman Berdnikov, pas disfatës së fundit në Kharkiv.
“Ajo që Rusia e përshkroi si një rigrupim në Kharkiv ishte në fakt një shpërbërje e plotë e trupave ruse, të cilat lanë pas shumë pajisje dhe municione”, tha Mason Clark nga Instituti Amerikan për Studimin e Luftës.
