150 bursa për studim në fushën e shkencës dhe teknologjisë, motiv për vajzat e reja
Agjencia Ndërkombëtare e Energjisë Atomike deri më 30 shtator do të pranojë aplikime për të fituar bursë për studime në fushën e shkencës dhe teknologjisë, më saktësisht në energjinë bërthamore, transmeton Portalb.mk.
“Procesi i aplikimit për ciklin MSCFP 2022 u hap më 15 korrik 2022 dhe afati i fundit i aplikimit është 30 shtator 2022. Bursat do të ndahen për studimet master në fusha të lidhura me shkencën bërthamore, me mundësi për të vazhduar punën e stazhit me ndihmën e ANEA deri në 12 muaj”, raportoi Ministria e Arsimit dhe Shkencës në Maqedoninë e Veriut.
Të rinjtë mund të aplikojnë për të fituar të drejtën e bursës për dy vitet e ardhshme akademike, ndërsa planifikohet ndarja e 150 bursave.
“Programi i Bursave Marija Skllodovska- Kiri është iniciativë e vazhdueshme që për qëllim ka të inkurajojë vajzat të ndjekin karrierë në fushën e shkencës dhe teknologjisë bërthamore, sigurisë bërthamore dhe mospërhapjen e armëve bërthamore”, raportoi Ministria.