Rreth 40% e shkollave dhe universiteteve në Ukrainë të gatshme për ta rinisur mësimin në shtator
Gati gjysma e shkollave dhe universiteteve në Ukrainë janë të gatshme të rinisin procesin mësimor në shtator, ka thënë ministri ukrainas i Edukimit, Serhiy Shkarlet, raporton Koha.net.
“Aktualisht, 41% e të gjitha institucioneve edukative e kanë mundësinë që ta nisin procesin mësimor në formatin tradicional”, ka thënë Shkarlet, raportoi CNN-i të mërkurën.
“Treguesit më të lartë të gatishmërisë për procesin arsimor në formën ballë për ballë janë në rajonin Lviv 83%, rajonin Chernivtsi 78% dhe në qytetit e Kievit, 68%. Rajonet e tjera vazhdojnë punën aktive në krijimin e kushteve të duhura dhe të sigurta në institucionet arsimore për mësim offline”, ka shtuar ai.
Ministri i Arsimit tha se shkollat do të kenë strehimore dhe se drejtorët duhet t’i ftojnë prindërit në një përpjekje për t’i bindur ata për sigurinë e ndërtesës.
“Është shumë e rëndësishme që prindërit të kenë mundësinë të sigurohen me sytë e tyre se fëmijët e tyre do të jenë të sigurt në institucionet arsimore. Prandaj, u bëj thirrje drejtorëve të shkollave që në rast të sinjalizimit të “Alarmit Ajror” t’u japin prindërve mundësinë të shohin kushtet e nxënësve në strehimore dhe të jenë në komunikim të vazhdueshëm me ta. Drejtorët mund të ofrojnë organizimin e takimeve me prindër, të cilat tradicionalisht mbahen para fillimit të vitit të ri shkollor, në ndërtesat mbrojtëse”, ka thënë Shkarlet.
