Qeveria e Kosovës akuzon grupet kriminale për sulmin në veri, nisin hetimet për rastin

21:00 – Pasi një njësit i Policisë së Kosovës është sulmuar sot me armë zjarri në ver, ministri i Brendshëm në Kosovë, Xhelal Sveçla, ka thënë se grupet ilegale serbe janë duke bërë përpjekje për të penguar punën e autoriteteve të Kosovës, transmeton REL.

Ai i ka bërë këto deklarata teksa ka komentuar sulmin e së shtunës ndaj zyrtarëve të Policisë së Kosovës në veri të vendit.

Sipas Policisë, njësiti për mbikëqyrjen e kufirit në Zubin Potok është sulmuar 10 herë me armë zjarri teksa ka qenë duke vendosur një barkë patrulluese në Liqenin e Ujmanit, por nuk ka të plagosur.

Sveçla ka thënë se Policia ka qenë duke kryer kontrollin rutinor në këtë liqen.

“Gjuajtja me armë drejt zyrtarit policor është sulm ndaj institucionit kryesor të shtetit. Për më pak se 1 javë, 2 herë strukturat kriminale kanë shtënë drejt zyrtarëve policorë për t’i penguar, ose për t’i vrarë ata”, ka thënë Sveçla në një postim në Facebook.

Sipas ministrit, grupet ilegale serbe “tashmë po mbrohen dhe mbështeten edhe publikisht nga struktura të caktuara serbe”.

Ai ka thënë se autoritetet nuk do të zmbrapsen nga kryerja e detyrave të tyre, “pavarësisht çdo sulmi të organizuar apo orkestruar nga kriminelë që ju pengon puna jonë në çdo cep të Republikës së Kosovës”.

Kryeministri i Kosovës, Albin Kurti, ka thënë më vonë se kanë nisur hetimet për këto të shtëna.

Sipas tij, kjo është hera e dytë në më pak se një javë që Policia e Kosovës është sulmuar nga “bandat kriminale në veri”.

“Fatmirësisht, nuk ka viktima. Sot, rrugët janë të lira nga barrikadat. Por bandat kriminale vazhdojnë t’i vendosin barrikada vetvetes kundër agjencive tona për zbatim të ligjit dhe kundër luftës sonë kundër krimit të organizuar”, ka thënë Kurti në një postim në Twitter.

Around 10 shots were fired today at Border Police embarking on a boat patrol on Lake Ujmani. This is the second time in less than a week that Kosova Police have been attacked by criminal gangs in the northern part of our territory, just six days after Sunday's incidents.

— Albin Kurti (@albinkurti) August 6, 2022

Një njësit i Policisë së Kosovës është sulmuar sot me armë zjarri në veri, kanë thënë zyrtarë të këtij institucioni, transmeton REL.

Përmes një postimi në Facebook, Policia ka thënë se njësiti për mbikëqyrjen e kufirit në Zubin Potok është sulmuar teksa ka qenë duke vendosur një barkë patrulluese në Liqenin e Ujmanit.

“Kanë qenë afërsisht 10 të shtëna me armë zjarri. Të shtënat kanë qenë të njëpasnjëshme, nga pjesa tjetër e liqenit dhe kanë goditur afër barkës së policisë. Nga këto të shtëna nuk ka persona të lënduar”, është thënë në njoftimin e Policisë.

Më pas në vendin e sulmit ka shkuar njësia për ndërhyrje të shpejtë.

Komunat në veri të Kosovës, si Mitrovicë e Veriut, Zubin Potok, Zveçan dhe Leposaviq, janë të banuara me shumicë serbe.

Sulmet ndaj Policisë së Kosovës

Kjo nuk është hera e parë që sulmohet Policia e Kosovës.

Vetëm në prill të këtij viti janë regjistruar të paktën gjashtë sulme ndaj këtij institucioni.