Mbi 30 për qind e familjeve në Maqedoninë e Veriut janë çifte të martuara pa fëmijë

Në vend ka gjithsej 538.348 familje, nga të cilat 62 për qind jetojnë në zona urbane dhe 38 për qind në zona rurale. Sipas përbërjes familjare, pjesa më e madhe – 43 për qind janë çifte të martuara me të paktën një fëmijë nën 25 vjeç që jeton me ta, ndërsa 31 për qind janë çifte të martuara pa fëmijë, tregon grupi i katërt i të dhënave nga Regjistrimi i Popullsisë, Amvisërive dhe Banesave 2021, që u publikua sot nga Enti Shtetëror i Statistikave, raportoi Fokus, përcjell Portalb.mk.

Mbi 26 mijë familje ose 4,9 përqind e familjeve janë nëna të vetme me të paktën një fëmijë nën moshën 25 vjeç dhe mbi nëntë mijë familje ose 1,7 përqind janë baballarë të vetëm me të paktën një fëmijë nën moshën 25 vjeç.

Mbi dhjetë për qind ose rreth 58 mijë familje janë çifte të martuara me fëmijën më të vogël 25 vjeç ose më i vjetër që jeton me ta.

Numri i përgjithshëm i familjeve individuale është 598.632, ndërsa numri mesatar i anëtarëve në amvisëri është 3,1.

Sipas numrit të anëtarëve në familjet individuale, 468.336 persona ose 25,5 për qind jetojnë në amvisëri me katër persona, ndërsa numri i personave në amvisëri me një person është 103.237 ose 5,6 për qind.

Numri i banesave të banuara në vend, sipas të dhënave të Regjistrimit 2021, është 531. 987 ose 63,4 për qind e numrit të përgjithshëm të banesave.