Charles Michel: Sot për RMV-në dhe Shqipërinë është ditë historike, tani fillojnë sfidat e reja

Fisnik Xhelili 12:49, 19-07-2022

Presidenti i Këshillit të BE-së me rastin e konferencave të përbashkëta ndërqeveritare mes Maqedonisë së Veriut dhe BE-së si dhe Shqipërisë dhe BE-së u shpreh se kjo është një ditë historike për të dy vendet si dhe një kohë për të festuar atë që është arritur, por edhe një kohë për të parë sfidat përpara me një objektiv të qartë: të përparojmë në rrugën drejt BE-së pa vonesë, shkruan Portalb.mk.

“Sot më në fund kemi bërë hapa të rëndësishëm përpara në hapjen e negociatave të anëtarësimit me Maqedoninë e Veriut dhe Shqipërinë. Konferencat ndërqeveritare në nivel ministror u mbajtën në Bruksel për të zbatuar vendimin e Këshillit Evropian të marsit 2020 për hapjen e bisedimeve të anëtarësimit. Përgëzoj autoritetet dhe qytetarët e Maqedonisë së Veriut dhe Shqipërisë për këtë arritje të shumëpritur”, u shpreh Michel.

Ai theksoi se rruga për të arritur në këtë pikë ka qenë e gjatë dhe sfiduese.

“Siç e kam parë nga dora e parë, debati ishte veçanërisht intensiv në Maqedoninë e Veriut, por përfundimisht ka çuar në një votim pozitiv në parlamentin e Maqedonisë së Veriut, sot vendi juaj po bën hapin e parë kyç në rrugën e negociatave me Bashkimin Evropian. Siç thashë në Shkup disa ditë më parë, Maqedonia e Veriut mund të llogarisë në mbështetjen time të plotë në këtë rrugëtim. Vendi ka ndërmarrë reforma të rëndësishme dhe e di që maqedonasit janë të përkushtuar për të ardhmen tonë të përbashkët në BE”, tha Michel.

Mes tjerash ai theksoi se rruga e negociatave të Shqipërisë tani është në rrugën e saj.

“Shqipëria ka punuar shumë për të siguruar rezultate nga reformat dhe një historik zbatimi në të gjitha fushat e identifikuara nga Këshilli. Sot është një ditë historike dhe një kohë për të festuar atë që është arritur, por edhe një kohë për të parë sfidat përpara me një objektiv të qartë: të përparojmë në rrugën drejt BE-së pa vonesë”, theksoi Michel.

Siç informon presidenti Michel, mbajtja e sotme e konferencave ndërqeveritare zhbllokon fazën tjetër si për Shqipërinë ashtu edhe për Maqedoninë e Veriut.

“Tani do të nisë procesi i skriningut, jo vetëm skriningu i përditësuar shpjegues, por edhe depistimi dypalësh. Negociatorët tanë, në Shkup, Tiranë dhe Bruksel, i pret punë e vështirë në këtë fazë vendimtare. Në muajt e ardhshëm, kjo do të ndërtojë një bazë solide për hapjen e grupeve të kapitujve negociues. Paralelisht, BE-ja do të fokusohet në ringjalljen e procesit të zgjerimit. Në takimin e liderëve BE-Ballkani Perëndimor dhe në Këshillin Evropian të qershorit, ne vendosëm të injektojmë një dinamikë të re dhe një vendosmëri të re për të ecur përpara së bashku. Ne do të avancojmë më tej integrimin gradual të BE-së dhe rajonit, tashmë gjatë procesit të zgjerimit”, tha Michel.

Ai përfundon se Ballkani Perëndimor i përket BE-së dhe ne duhet ta bëjmë këtë të ndodhë.

Sot në Bruksel u zhvillua konferenca e përbashkët ndërqeveritare RMV- BE dhe Shqipëri BE. Kryeministri Kovaçevski në gjuhën maqedonase lexoi fjalën hyrëse.

Sipas shefit të diplomacisë, Bujar Osmani, do të fillojë procesi i skriningut, i cili do të zgjasë një vit e gjysmë. Pas përfundimit të skriningut, është planifikuar Konferenca e dytë ndërqeveritare, në të cilën duhet të përfundojë faza e hapjes së negociatave, por mbajtja e saj kushtëzohet me ndryshimet kushtetuese, përkatësisht me përfshirjen e bullgarëve në Kushtetutë.

Kryeministri Kovaçevski u shpreh i kënaqur që pas 17 vitesh pritje, vendi do të fillojë negociatat.

Ndërkohë, përfaqësuesi i lartë i Bashkimit Evropian për politikën e jashtme, Josep Borrell, tha se Maqedonia po fillon Negociatat me identitet të plotë dhe të pacënueshëm, ku gjuha dhe identiteti mbeten të mbrojtura.

Edhe Ambadadori evropian në Maqedoni David Geer, tha se sot është vërtet një ditë historike në marrëdhënie Maqedoni-BE.

Këshilli i BE-së mbrëmë, ndërkohë, dha dritën jeshile për hapjen e negociatave të anëtarësimit me Maqedoninë e Veriut dhe Shqipërinë, njoftoi Presidenca çeke e BE-së.

Ambasadorët e vendeve anëtare ranë dakord për kornizat e negociatave për dy vendet, duke krijuar kështu kushtet për konferencën e parë ndërqeveritare të anëtarësimit, e cila edhe u mbajt sot këtu në Bruksel.

Maqedonia është kandidate për anëtarësim në BE për 17 vjet. Hapja e negociatave me vendin tonë fillimisht u bllokua nga Greqia dhe bllokada u hoq vetëm pasi vendi pranoi të ndryshonte emrin nga Maqedoni në Maqedoni e Veriut, gjë që na lejoi të hyjmë në NATO.

Pas heqjes së bllokadës greke, Bullgaria u shfaq me kërkesat e saj që vënë në dyshim identitetin dhe gjuhën kombëtare maqedonase.

Maqedonia e Veriut pranoi propozimin e Francës, e cila kryesoi Këshillin e BE-së në gjysmën e parë të vitit. Propozimi u votua në parlament pa pjesëmarrjen e opozitës, e cila njoftoi se nuk do të mbështesë ndryshimin e Kushtetutës për të përfshirë pakicën kombëtare bullgare. Ndryshimi i Kushtetutës kërkon një shumicë prej dy të tretash, të cilën koalicioni qeverisës nuk e ka pa deputetë të opozitës.

Ministrat e Punëve të Jashtme të Maqedonisë së Veriut dhe Bullgarisë, Osmani dhe Teodora Gençovska, nënshkruan para dy ditësh në Sofje protokollin dypalësh. Atij i ka paraprirë një mbledhje e komisionit ndërqeveritar.

Pas kthimit nga Sofja, Osmani prezantoi protokollin bilateral në një konferencë për media. Ai tha se i gjithë protokolli është i ndërsjellë dhe se të gjitha angazhimet për historinë vijnë vetëm pasi të kenë rënë dakord historianët në Komisionin e përbashkët historik.

Ministritë e Jashtme të dy vendeve kanë publikuar para dy ditëve njëkohësisht dokumentin që kanë firmosur krerët e shteteve.

Kryetari i partisë më të madhe opozitare, Hristijan Mickoski, ka deklaruar se do të kërkojë mbajtjen e referendumit për ndryshimet kushtetuese. Ai do t’i propozojë Komitetit Ekzekutiv të VMRO-DPMNE-së që të nis iniciativën për mbledhjen e 150 mijë nënshkrimeve për mbajtjen e referendumit.

Ndryshe, propozimi francez për zgjidhjen e ngërçit Bullgari-Maqedoni e Veriut dhe hapjen e negociatave eurointegruese, në vend mbërriti më 30 qershor.

Kujtojmë se para heqjes së vetos, hapja e negociatave me Bashkimin Evropian për Maqedoninë e Veriut bllokohej vazhdimisht nga Bullgaria.