Mickoski për miratimin e propozimit francez në Kuvend: Asgjë s’ka mbaruar
Informacioni që kaloi në Kuvend nuk ka asnjë kuptim sepse korniza miratohet nga qeveria, por, për rrjedhojë, detyrimet që dalin nga korniza e negociatave, që është ndryshimi i Kushtetutës me qëllim të futjes së bullgarëve, nuk do të kalojnë në Kuvendin e Maqedonisë, tha lideri i opozitës VMRO-DPMNE, Hristijan Mickoski, në konferencë për media pas votimit të propozim-konkluzioneve për propozimin francez, transmeton Portalb.mk.
Mickoski tha se deputetët e VMRO-DPMNE-së dhe koalicionit kanë nënshkruar deklarata të noterizuara në të cilat marrin përsipër të mos pranojnë ndryshime në Kushtetutë. Përfshirja e bullgarëve në kushtetutën e Maqedonisë është kusht për konferencën e dytë ndërqeveritare dhe fillimin e negociatave me BE-në.
“Populli mund të jetë i qetë, ky nuk është viti 2019. Me iniciativën e deputetëve si garanci me të cilën angazhohemi ndaj qytetarëve për premtim tonë, me synimin për të bllokuar tradhtinë e kësaj Qeverie, janë deklaratat e deputetëve të vërtetuara në noter, se me ndërgjegje të pastër dhe të shëndoshë ata nuk do të pranojnë ndryshimin e Kushtetutës dhe për këtë garantojnë me nderin, ndërgjegjen dhe dorëheqjen e tyre që hyn në fuqi menjëherë nëse kjo ndodh. Besoj se asnjë deputet nuk do ta miratojë këtë tradhti dhe ju e keni fjalën time që nuk do të ndodhë. Këto janë ato deklarata, të noterizuara”, tha kreu i opozitës duke mbajtur në dorë disa letra.
Ai shtoi se pas përfundimit të mandatit të deputetëve të LSDM-së do të përgjigjen penalisht, ndërsa qytetarëve u tha se “asgjë nuk ka përfunduar”.
Kuvendi i Maqedonisë së Veriut sot e ka miratuar informacioni për propozimin francez, pasi lista e deputetëve që morën fjalën u shterua. 68 deputetë votuan “për”, ndërkaq paraprakisht sallën e kanë lëshuar deputetë të koalicionit VMRO-DPMNE dhe deputetët e Levicës. Pas votimit deputetët e shumicës parlamentare me duartrokitje e përshëndetën miratimin e propozimit francez dhe valëvitën flamujt e RMV-së dhe BE-së.
Vetëm dhjetëra minuta pas miratimit të propozimit francez në Kuvendin e Maqedonisë së Veriut, arritën përshëndetjet nga kreu i Bashkimit Evropian dhe Komisionit Evropian.
Në sallën e Kuvendit në dy ditët e para atmosfera u përcoll me akuza nga të dy taborët. VMRO-DPMNE-ja opozitare dhe Levica kërkuan refuzim të këtij propozimi i cili, sipas tyre, çon drejt asimilimit të popullit maqedonas dhe shantazhe dhe pengesë shumëvjeçare e procesit eurointegrues nga ana e Bullgarisë. Për dallim nga ata, nga deputetët e partive qeveritare qetësonin se korniza negociuese ofron moscenim të integritetit territorial dhe gjuhës maqedonase dhe fillim të negociatave për anëtarësim të plotfuqishëm në BE.
- LEXO: Debat me fjalor të papërshtatshëm në Kuvend, BE përsëriti se Maqedonia e Veriut duhet të shfrytëzojë mundësinë për negociata
- LEXO: Qeveria e RMV-së: I dënojmë sulmet jo të civilizuara në Kuvend nga ana e opozitës
Ndryshe, propozimi francez për zgjidhjen e ngërçit Bullgari-Maqedoni e Veriut dhe hapjen e negociatave eurointegruese, në vend mbërriti më 30 qershor, pas së cilës kryeministri Kovaçevski njoftoi proces të gjerë konsultimi me koalicionin qeveritar, presidentin e vendit, Parlamentin, opozitën, si dhe me sektorin civil, ekspertët dhe publikun e gjerë në vend.
Së fundmi në Bullgari, ra Qeveria e kryeministrit Kiril Petkovit, çka rëndoi edhe më tej krizën politike në Bullgari. Në Samitin e BE-së, Bullgaria nuk e kishte hequr veton, pasi parlamenti duhej të miratonte propozimin francez dhe për rrjedhojë edhe të hiqte veton. Por pas Samitit, gjegjësisht më 24 qershor të këtij viti propozimi i Macronit kaloi në Parlamentin bullgar, që nënkuptonte heqjen e vetos nga Bullgaria ndaj Maqedonisë së Veriut, por njëkohësisht edhe heqjen e pengesës për Shqipërinë për vijimin e mëtejshëm të procesit integrues në BE.
Kujtojmë se para heqjes së vetos, hapja e negociatave me Bashkimin Evropian për Maqedoninë e Veriut bllokohej vazhdimisht nga Bullgaria. Sofja zyrtare kërkonte që Shkupi t’i pranojë kërkesat bullgare se gjuha maqedonase është normë e asaj bullgare dhe se kombi maqedonas është krijuar nga Josip Broz Tito. Ky kontest bllokoi për dy vite procesin eurointegrues të vendit, me çka Bullgaria gjatë vitit 2021 i vendosi dy herë veto Maqedonisë së Veriut, njëherë në qershor, kurse më pas, më 14 dhjetor të vitit 2021, edhe një herë e bllokoi fillimin e negociatave RMV-BE.
Edhe në vitin 2020, njëjtë vendi fqinj, i vendosi dy here veto Maqedonisë së Veriut, një herë në këshillin e ministrave të Jashtëm të BE-së si dhe në Këshillin për Punë të Përgjithshme të BE-së, duke penguar në këtë mënyrë miratimin e kornizës negociuese për fillimin e negociatave të vendit me BE-në. Për zgjidhjen e kontesteve të historisë, komisioni maqedonaso – bullgar ka mbajtur takime, po nuk kanë arritur të gjejnë zgjidhje. Palët kanë mosmarrëveshje më së shumti rreth identitetit të figurave historike të Mbretit Samoil dhe Goce Delçevit.
- LEXO: Qeveria dorëzoi në Kuvend shtesën e Informacionit për përmbajtjen e kornizës së propozim-negocimit
- LEXO: Këshilli e Ambasadorëve: Kompromiset të vështira, por “propozimi francez” betonon dhe garanton gjuhën dhe identitetin maqedonas
- LEXO: MPJ: Sërish u shfaqën informacione të pasakta për përmbajtjen e Protokollit që të prishen konsultimet për propozimin