Mickoski: Farsa në Kuvend mund t’ju kalojë, por ndryshim i Kushtetutës jo
Kryetari i VMRO DPMNE-së, Hristijan Mickoski, pret që propozimi francez të kalojë në seancën e nesërme parlamentare, por koalicionit qeverisës i dërgoi mesazh se ndryshimet kushtetuese nuk do të bëhen pa votat e partisë që ai drejton, transmeton Portalb.mk.
“Sonte në orën 19:00 para Qeverisë, përmes MPJ-së deri në Kuvend! Ultimatum, JO faleminderit!”, ka shkruar Mickoski.
Информацијата и фарсата во Собрание може да ви помине, но промена на Уставот НЕ!
Вечер во 19 часот пред Влада, преку МНР до Собрание!
Ултиматум, НЕ благодарам!
— Христијан Мицкоски (@MickoskiHM) July 13, 2022
Kujtojmë se opozita maqedonase VMRO-Levica mbi një javë protestojnë kundër propozimit francez, madje pasditen e 5 korrikut është shmangur incident ndëretnik pasi një grup protestuesish maqedonas, u përleshën me një grup të qytetarëve shqiptarë të cilët kanë qenë në sheshin “Skënderbeu” në Shkup. Policia parandaloi përballje direkte dhe përshkallëzim të situatës.
Gjatë incidentit janë përdorur gurë, shishe dhe gjësende të forta, por janë dëgjuar dhe të shtëna me armë zjarri. Policia ka reaguar në kohë dhe ka shmangur përplasjen direkte. Si rezultat i këtij incidenti, janë dëmtuar disa makina të cilat kanë qenë të parkuara në parkingun afër sheshit.
Ndryshe, së fundmi në Bullgari, ra Qeveria e kryeministrit Kiril Petkovit, çka rëndoi edhe më tej krizën politike në Bullgari. Në Samitin e BE-së, Bullgaria nuk e kishte hequr veton, pasi parlamenti duhej të miratonte propozimin francez dhe për rrjedhojë edhe të hiqte veton. Por pas Samitit, gjegjësisht më 24 qershor të këtij viti propozimi i Macronit kaloi në Parlamentin bullgar, që nënkuptonte heqjen e vetos nga Bullgaria ndaj Maqedonisë së Veriut, por njëkohësisht edhe heqjen e pengesës për Shqipërinë për vijimin e mëtejshëm të procesit integrues në BE.
