RMV, tarifa e re do t’i “djegë” ata që do të ngrohen me energji elektrike

Me sa duket se batanijet do të jenë ngrohja e vetme e lirë këtë dimër. Ata të cilët dimrin e kaluar kanë paguar 7500 denarë rrymë, sipas metodologjisë së re për llogaritjen e çmimeve do të duhet të paguajnë 800 denarë më shumë. Kur kësaj i shtohet edhe rritja e paralajmëruar e rrymës, për të njëjtën rrymë të konsumuar në dimrin e ardhshëm do të duhet të paguajnë mbi 9100 denarë, shkruan REL në gjuhën maqedonase.

Një familje prej katër anëtarësh nga Shkupi, me dy fëmijë të vegjël, e cila jeton në katin e një shtëpie prej 80 metrash katrorë në mars të këtij viti ka paguar rrymë prej 7500 denarë. Familja ngrohet me kondicioner inverter.

Sipas metodologjisë së re për llogaritjen e çmimit të rrymës, ai duhet të paguaj mbi 8300 denarë, pra gati 11 për qind më shtrenjtë. Dhe kjo është vetëm përllogaritja e faturës, sipas tarifës së re, e cila ende nuk është miratuar.

Këtë e tregon përllogaritja e kalkulatorit të publikuar në faqen e Komisionit Rregullator për Energjetikë.

Kur kësaj i shtohet edhe shtrenjtimi i paralajmëruar i energjisë elektrike nga muaji i ardhshëm, për të cilën kryetari i Komisionit Rregullator për Energji Marko Bislimovski tha se mund të jetë rreth 10 për qind, fatura që në mars të këtij viti ishte 7500 denarë, në nëntor për të njëjtën rrymë të konsumuar do të jetë 9130 denarë, gjegjësisht më e lartë për 1600 denarë, ose 22 për qind.

Fatura e energjisë elektrike dhe përllogaritja sipas metodologjisë së re

Ata që në dimër kanë shpenzuar 9000 denarë për rrymë, me metodologjinë e re mund të marrin fatura më të larta edhe për 2000 mijë denarë.

Faturat verore, sipas metodologjisë së re, mund të jenë 100-300 denarë më të ulëta se ato aktuale, por nuk do të mund ta kompensojnë shtrenjtimin gjatë dimrit.

Komisioni rregullator muajin e kaluar njoftoi se 17 familje kanë konsumuar energji elektrike sa 80.000 familje mesatare. Disa prej tyre ngrohin pishina të mëdha dhe disa dyshohet se gërmojnë kriptovaluta ose e përdorin për biznese të tjera. Është paralajmëruar një metodologji e re për t’u marrë me konsumatorët kaq të mëdhenj, por duket se askush nga ata që ngrohen me energji elektrike nuk do të kursehet. Sipas përllogaritjeve të Komisionit Rregullator, rreth 13 për qind e familjeve, sipas tarifës së re, do të paguajnë më shumë.

“U paralajmërua se ata që i ngrohin pishinat në dimër do të paguajnë më shumë, por siç janë gjërat, të gjithë do të paguajmë fatura më të larta, edhe atë shumë më të larta”, tha një qytetar i Shkupit, faturën e rrymës së të cilit e analizuam në fillim.

Sipas të dhënave të Entit Shtetëror të Statistikave nga viti 2019, rreth një e treta e amvisërive në vend ngrohen me energji elektrike.

Profesori Konstantin Dimitrov thotë se kur nuk ka prodhim të mjaftueshëm të rrymës vendore dhe blihet me çmime të larta nga jashtë, nuk ka se si rryma të mos shtrenjtohet.

“Kjo është një masë politike që nuk e zgjidh problemin. Do të paguajmë më shumë dhe kaq. Energjia elektrike do të jetë më e shtrenjtë, kjo ishte pak për të qetësuar njerëzit. Pra, jini të qetë, nuk ka alternativë, do të jetë më e shtrenjtë”, thotë Dimitrov.

Komisioni Rregullator për Energjetikë dhjetë ditë më parë shpalli tarifën e re për përllogaritjen e çmimeve. Nuk do të ketë ndryshime në mënyrën e përllogaritjes së rrymës së lirë, por në vend të një tarife të shtrenjtë si më parë, nga muaji i ardhshëm do të ketë disa tarifa – ata që konsumojnë më shumë do të paguajnë më shumë për rrymën e shtrenjtë.

Energjia elektrike e konsumuar deri në 210 kilovat orë me tarifë të shtrenjtë në muaj, do të paguhet 35 për qind më lirë se tani, konsumi ndërmjet 210 dhe 420 kilovat orë do të jetë me çmime të ngjashme me ato aktuale, midis 420 dhe 630 kilovat orë do të jetë më shtrenjtë, ndërsa çdo kilovat orë mbi kufirin prej 630 kilovat orë energjia elektrike e shtrenjtë në muaj do të jetë shumë më e shtrenjtë dhe do të jetë me një çmim të ngjashëm me energjinë elektrike industriale.

Nëse, për shembull, një familje konsumon 650 kilovat orë energji elektrike të shtrenjtë, atëherë 210 kilovat orë të para do të paguajnë me çmim më të ulët, 210 kilovat orë të tjera me një çmim tjetër, e treta 210 me çmim më të lartë dhe 20 kilovat orë të tjera me çmim më të lartë tarifa më e shtrenjtë.

Komisioni Rregullator nuk i publikoi çmimet e blloqeve speciale, por e shpalli, në faqen e tij të internetit, kalkulator në të cilin mund të bëhet një krahasim mes metodologjisë së vjetër dhe asaj të re.

Në të njëjtën kohë, qeveria dhe Qyteti i Shkupit ofrojnë subvencione për blerjen e inverterëve të ngrohjes. Ekspertët theksojnë se inverterët janë ende mënyra më ekonomike e ngrohjes, pasi burimet e tjera të energjisë janë bërë më të shtrenjta.

Sipas të dhënave të Eurostat për vitin 2018, pothuajse 25 për qind e banorëve të Maqedonisë kanë deklaruar se nuk munden t’i  t’i ngrohur shtëpitë si duhet, krahasuar me mesataren e BE-së prej 7,3 për qind.