Shkup, është hapur ekspozita “Evolucioni – maska nga ngushtica Torres” në “Stacionin e vogël”
Në objektin Stacioni i vogël (Mala Stanica) të Galerisë Kombëtare të Maqedonisë mbrëmë u hap ekspozita ndërkombëtare udhëtuese e krijuar nga Qendra kulturore “Gab Titui” në bashkëpunim me Muzeun kombëtar të Australisë, Ministrinë australiane të punëve të jashtme dhe tregtisë dhe Ambasadën australiane në Beograd, shkruan Meta.mk, transmeton Portalb.mk.
Ekspozita shfaq maska nga zona e ngushticës Torres – grup ishujsh që ndodhen midis Australisë veriore dhe Papua Guinesë së Re. Një nga specifikat e traditës së këtij rajoni është mbajtja e maskave të dekoruara bukur, ndaj kjo ekspozitë shqyrton praktikën e pasur dhe të pandërprerë të bërjes së tyre në ngushticën e Torresit.
Në hapje të ekspozitës fotografike u theksua se këto maska janë objekte të jashtëzakonshme me rëndësi rituale historike me kompleksitet dhe specifikë të jashtëzakonshme në detajet që posedojnë.
Ekspozita dokumentare u hap nga ambasadori i Australisë në Maqedoninë e Veriut, Daniel Joseph Emery, i cili theksoi se ekspozita eksploron traditat e pasura dhe një nga traditat kulturore më karakteristike të bërjes dhe mbajtjes së maskave të dekoruara bukur.
“Arti autokton australian është unik. Ai pasqyron kulturën e lashtë të njerëzve, si dhe peizazhet më karakteristike, natyrën dhe jetën e egër të vendeve ku ata jetojnë. Për banorët e ishujve në ngushticën e Torresit, jeta detare dhe bregdetare janë evidente në të gjitha aspektet e artit të tyre. Australianët indigjenë nuk kanë gjuhët e tyre të shkruara, por përdorin media kulturore si veprat e artit, tregimet, vallëzimet, këngët – të gjitha për të përcjellë informacion jetik dhe për të ruajtur kulturën e tyre. Simbolet tradicionale të përdorura në veprat e tyre artistike, të cilat shihen në maska, luajnë një rol të rëndësishëm në këtë proces”, tha ambasadori Emery.
Ekspozita paraqet punën e njerëzve nga ishujt e ngushticës Torres, e cila numëron mbi 270 ishuj. Njerëzit e ishujve janë etnikisht, kulturalisht dhe gjuhësisht të ndryshëm nga indigjenët që jetojnë në kontinentin Australian, u theksua në hapjen e ekspozitës.
Bërja e këtyre maskave përfshin aftësi në një sërë teknikash, materialesh dhe mjetesh.
Maskat e bëra nga lëvozhgat e breshkave, pendët dhe fibrat e kokosit dhe ritualet që lidhen me to janë lidhja përmes së cilës personi që mban maskën ndryshon disi identitetin dhe në kulturat e lashta ishte gjithashtu një urë për të hapur lidhjet për të komunikuar me paraardhësit. Studiuesit mblodhën maska nga këto zona gjatë shekullit të 19-të dhe sot ato janë pjesë e koleksioneve historike.
Ekspozita “Evolutcion – Maska nga ngushtica Torres” në “Mala Stanica” është e hapur deri më 21 qershor.
