Deklarata e Lavrov tregoi se Ballkani i Hapur u ideua në Serbi, vlerësoi deputetja Mimoza Kusari-Lila

F1 C 19:03, 07-06-2022

Shefja e Grupit Parlamentar të Lëvizjes Vetëvendosje, Mimoza Kusari Lila thotë se deklarata ministrit të Jashtëm rus, Sergei Lavrov se Rusia mbështet Ballkanin e Hapur, tregoi se kjo nismë u ideua në Serbi.

Në një intervistë për “Euronews Albania”, Kusari-Lila u shpreh se Ballkanin e Hapur, Serbia kërkon ta shfrytëzojë si një mekanizëm për të rritur ndikimin rus dhe kinez në rajon.

“Ne e kemi ditur se kjo iniciativë e ka burimin në Serbi. Është një mekanizëm të cilin Serbia, si një prej vendeve me numrin më të madh të popullsinë në Ballkanin Perëndimor, do e shfrytëzonte për ndikimin rus dhe kinez. Kjo deklaratë e Lavrov duhet t’u bëhet si pyetje liderëve të tjerë, përveç Vuçiç që e ka ftuar në Beograd”, u shpreh Kusari-Lila.

Sipas saj, Kosova nuk mund të përfshihet në këtë nismë rajonale, kur Serbia nuk e trajton si një shtet të barabartë.

Ajo shtoi se Kosova është e fokusuar dhe e angazhuar në Procesin e Berlinit, qëllimi i së cilës është barazia midis gjashtë vendeve të Ballkanit Perëndimor.

Në Ohër të Maqedonisë së Veriut do të mbahet sot dhe nesër nisma rajonale, Ballkani i Hapur. Në këtë nismë, do të marrë pjesë për herë të parë edhe Mali i Zi, pasi disa ditë më parë, kryeministri Dritan Abazoviç konfirmoi pjesëmarrjen e tij.

Ndryshe, ministri i punëve të jashtme ruse, Sergej Lavrov shprehet ndër të tjera se Ballkani i Hapur ishte një iniciativë serbe dhe se Rusia e mbështeste këtë pavarësisht kundërshtimeve të Brukselit.

Sot dhe nesër në Ohër do të mbahet samiti dyditor i iniciativës “Ballkani i Hapur”, në fokusin e të cilit do të jenë kultura dhe turizmi. Në njoftimin zyrtar të Qeverisë, sqarohet që nesër priten të nënshkruhen disa marrëveshje dhe memorandum për bashkëpunim në sfera të ndryshme.