RMV, mësimdhënësit të kenë mirëkuptim gjatë vlerësimit, nxënësit mësuan në një realitet të ri
Në këtë periudhë të vitit, nxënësit e shkollave fillore dhe të mesme kanë teste dhe pyetje pothuajse në të gjitha lëndët, që më pas mësuesit dhe profesorët e tyre të mbyllin notat përfundimtare në ditar. Gjatë këtij procesi, Meta.mk bisedoi me disa profesorë për atë se si po shkon procesi, nëse nxënësit ia dalin të mësojnë gjithçka dhe sa ata si profesorë kanë mirëkuptim dhe sa bëjnë lehtësime, transmeton Portalb.mk.
Nikolina Ivanoska Kotevska është profesoreshë e psikologjisë në shkollat e mesme “Nikolla Karev” dhe “Georgi Dimitrov”. Ajo thotë se në këtë periudhë të vitit, kur vlerësohen arritjet e nxënësve dhe bëhen notat vjetore për lëndët, duhet të merren parasysh të gjitha ngjarjet ndaj të cilave vetë nxënësit, prindërit e tyre, por edhe profesorët ishin të ekspozuar.
“Nuk jam e sigurt se çdo mësues apo profesor ka një metodologji të përshtatshme për të nxjerrë notën përfundimtare duke i pasur parasysh orët e humbura (vetë fillimi i vitit shkollor, greva e mësuesve). Udhëzimi që u është dhënë mësuesve nga organet përkatëse është vetëm një përllogaritje matematikore e fondit të orëve të realizuara, të cilat në total duhet të ishin realizuar nga mësuesi”, thotë profesoresha.
Shkurtimi i programit, kriteret e vlerësimit dhe vlerësimi i nxënësit i lihet vetë mësuesit, prandaj presioni ndaj nxënësve varet nga perceptimi subjektiv dhe nga kërkesat e një mësuesi apo profesori të caktuar.
“Ajo që dua të theksoj nga pikëpamja psikologjike është se gjatë formimit të notave vjetore nuk duhet të harrojmë se nxënësit e kanë ndjekur vitin e kaluar shkollor nga distanca, ndërsa vitin paraprak (nga marsi deri në fund të tij) shumica e tyre nuk kishin mësim. Edhe këtë vit kemi një numër të madh të orëve të parealizuara. Ky fakt ndikon në gjendjen mendore të nxënësve dhe atyre u duhet vërtet aftësi dhe kujdes i madh në kërkesat që ua kemi parashtruar”, thekson Ivanoska Kotevska.
Tatjana Aleksiq, profesoresha e gjuhës maqedonase në gjimnazin “Rade Jovçevski Korçagin”, thotë se maturantët në këtë periudhë përfundojnë me festimet e maturës dhe tashmë ditët deri në fillimin e provimeve të maturës i kanë të numëruara.
“Nxënësit në “Korçagin” janë duke u përgatitur tashmë një kohë të gjatë dhe këto ditë po i mbledhim në klasa të tëra për të kaluar edhe një herë materialin që e kanë harruar nga tre vitet e kaluara. Ne jemi në dispozicion të tyre si në shkollë ashtu edhe në internet në çdo kohë. “Para se të mbaronin vitin shkollor me detyrën e katërt me shkrim, i mbylla me kyç ata nxënës që ishin aktiv i konfirmonin pestat gjatë vitit muajin e kaluar, në mënyrë që të përmirësonin notat në lëndët e tjera”, tha profesoresha.
Shton se kjo është më e pakta që ka mund të bënte që nxënësit të ndiejnë të paktën një përfitim nga puna e tyre, kur në fund do të shohin të njëjtat pesëshe te shokët e tjerë të klasës për shkak të mesatares.
“Por jo të gjitha pesëshet janë të njëjta, kështu që ka një sistem ku mesatarja është vendimtare. Meqenëse kemi kaluar tre vjet në një realitet të ri, do të ishte joracionale t’i përmbaheshim parimeve të objektivitetit dhe vlerësimeve realiste. Prej meje morën nga një notë më shumë duke iu kërkuar falje atyre, të cilët me të vërtetë e meritonin pesëshet, që nuk mund t’u shkruaj dhjetëshe”, tha Aleksiq.
Përkujton se së bashku kanë kaluar një periudhë të vështirë me shumë orë të humbura për të cilat fëmijët nuk kanë asnjë faj.
“Jam e bindur se do të arrijnë rezultate të mëdha sepse ata dinë të shkëlqejnë me rezultate të mëdha në fund, kur nuk kanë më forcë. Kjo gjeneratë tashmë e ka kaluar provimin e pjekurisë, duke mbetur me shpirt dhe trup të shëndoshë pavarësisht gjithë vështirësitë. Kërkoj që të studiojnë me zell, të investojnë në njohuritë dhe aftësitë e tyre si i vetmi kapital real, për të riparuar sistemin që ua rrënuam”, thekson profesoresha.
Vlerësim ka edhe në shkollat fillore. Një mësuese nga brendia e vendit, e cila jep mësim klasor, thotë se detyra më e vështirë për një mësues është të vlerësojë në mënyrë reale dhe të drejtë nxënësit.
“Vlerësimi është një kombinim i disa faktorëve. Mbi të gjitha vlerësohen arritjet e synimeve dhe standardeve të vendosura dhe sigurisht një pjesë e merr përkushtimi, zelli, këmbëngulja e nxënësit, pra sa mirë i kryen detyrat e vendosura.
Në periudhën e parë vlerësimi është përshkrues, ndërsa në klasat e para pothuajse nuk ka teste. Realizohen fletë praktike, kuize, apo mundësisht teste tematike”, tha mësuesja.
Gjatë formimit të notës së nxënësit shpesh ndikon disiplina e tij/saj, gjë që nuk duhet të jetë kështu. Ekspertët thonë se vlerësimi nuk duhet të shërbejë si mjet për ndëshkimin e nxënësve.
Viti shkollor përfundon më 10 qershor. Zyrtarët në Ministrinë e Arsimit dhe Shkencës (MASH) kanë vendosur të mos e zgjasin atë.
