Dendias nga Shkupi: RMV-ja të fillojë menjëherë negociatat me BE-në
Ministri i Jashtëm grek, Nikos Dendias, në kuadër të vizitave të tij në Ballkanin Perëndimor, sot pasdite vizitoi Shkupin, ku në një konferencë të përbashkët për shtyp me ministrin e Jashtëm Bujar Osmanin, dërgoi një mesazh të qartë se Greqia është e mendimit se Maqedonia e Veriut dhe Shqipëria duhet të nisin menjëherë negociatat me BE-në, shkruan 360 Shkallë, transmeton Portalb.mk.
Ministri i Jashtëm grek theksoi se Greqia dëshiron dhe punon shumë për të siguruar paqen, sigurinë dhe stabilitetin në rajon.
“Greqia beson se e vetmja mënyrë për të arritur këto synime është mbështetja e qartë dhe e plotë për perspektivën evropiane të Ballkanit Perëndimor. Ne kemi besim dhe besojmë thellë se negociatat e anëtarësimit në BE me Shqipërinë dhe Maqedoninë e Veriut duhet të fillojnë menjëherë. Ky është mesazhi që ne po u përcjellim aleatëve tanë evropianë gjatë gjithë kohës.” tha Dendias.
Ministri Osmani foli edhe për nevojën që vendi të fillojë negociatat, duke theksuar se kjo tashmë është çështje e sigurisë.
“Pushtimi rus i Ukrainës ka treguar se rajoni ka nevojë për investime shtesë në rezistencën ndaj kërcënimeve. Si aleatë të NATO-s ne kemi detyrimin të kujdesemi për stabilitetin rajonal dhe në këtë drejtim jam veçanërisht i kënaqur që kemi një qasje të koordinuar në interes të rajonit dhe Evropës. Në të njëjtën mënyrë, besoj se perspektiva evropiane e rajonit është një çështje me interes sigurie si për ne ashtu edhe për Evropën. Fillimi i negociatave me Maqedoninë e Veriut dhe Shqipërinë është mënyra më e mirë për të rikthyer besueshmërinë evropiane në rajon dhe në këtë drejtim jam veçanërisht i kënaqur që kemi mbështetjen e plotë të Greqisë”, tha Osmani.
Në konferencën për shtyp u theksua se shkëmbimi ekonomik mes Maqedonisë së Veriut dhe Greqisë në vitin 2021 ka arritur pak më shumë se 930 milionë euro dhe nëse merren parasysh të dhënat nga tremujori i parë i këtij viti kur janë mbi 350 milionë euro, pritet që në vitin 2022 shifra do të kalojë një miliard euro. Dendias zbuloi gjithashtu se një kompani e madhe greke është e interesuar të investojë 200 milionë euro në një termocentral. Ministri Osmani theksoi se Greqia është partneri i katërt më i madh ekonomik i vendit.
Kujtojmë se hapja e negociatave me Bashkimin Evropian për Maqedoninë e Veriut bllokohet nga Bullgaria. Dy vendet raportet për shkak të kontesteve historike. Sofja zyrtare kërkon që Shkupi t’i pranojë kërkesat bullgare se gjuha maqedonase është normë e asaj bullgare dhe se kombi maqedonas është krijuar nga Josip Broz Tito. Ky kontest ka bllokuar procesin eurointegrues të vendit, me çka Bullgaria gjatë vitit 2021 i vendosi dy herë veto Maqedonisë së Veriut, njëherë në qershor, kurse më pas, më 14 dhjetor të vitit 2021, edhe një herë e bllokoi fillimin e negociatave RMV-BE.
Edhe në vitin 2020, njëjtë vendi fqinj, i vendosi dy here veto Maqedonisë së Veriut, një herë në këshillin e ministrave të Jashtëm të BE-së si dhe në Këshillin për Punë të Përgjithshme të BE-së, duke penguar në këtë mënyrë miratimin e kornizës negociuese për fillimin e negociatave të vendit me BE-në. Për zgjidhjen e kontesteve të historisë, komisioni maqedonaso – bullgar ka mbajtur takime, po nuk kanë arritur të gjejnë zgjidhje. Palët kanë mosmarrëveshje më së shumti rreth identitetit të figurave historike të Mbretit Samoil dhe Goce Delçevit.
- LEXO: Kovaçevski – Petkov: Nuk ka progres, të vazhdojë dialogu për zgjidhje të bazuar në vlerat evropiane
- LEXO: Kovaçevski: Nuk mund të them se ka përparim me Bullgarinë në lidhje me arritjen e një dokumenti të pranueshëm për të dyja palët
- LEXO: Maqedonia mund të përballet me shumë sfida nëse shtyhet sërish procesi i eurointegrimeve