Ueb-faqja e përhershme e ARS-së më në fund është gati, por nuk është publikuar ende, këtë javë vendoset data e publikimit
Ueb-faqja e re e Agjencisë për Rini dhe Sport (ARS) e cila do të jetë në tre gjuhë: shqip, maqedonisht dhe anglisht është gati, këtë javë vendoset data zyrtare se kur e njëjta do të publikohet. Kështu konfirmuan nga ARS-ja për Portalb.mk. Megjithatë, Agjencia me muaj vazhdimisht ka thënë se e njëjta do të lëshohet në përdorim shpejtë, por nuk ndodhi ashtu.
Ueb-faqja e përhershme e Agjencisë për Rini dhe Sport e cila është donacion nga OSBE-ja ende nuk është lëshuar në përdorim për opinionin. ARS-ja deri në lëshimin në funksion të ueb-faqes së re për momentin ka në dispozicion një ueb-faqe të përkohshme në tre gjuhë: shqip, maqedonisht dhe anglisht, e cila u lëshua në përdorim nëntorin e kaluar.
ARS-ja për Portalb.mk njofton se të gjitha procedurat rreth krijimit të ueb-faqes kanë mbaruar dhe ueb-faqja e re ka marrë strukturën e duhur për publikimin e saj. Këtë javë vendoset se kur do të publikohet e njëjta.
“Periudhën e fundit ka pasur takime intensive mes donatorit, realizuesit dhe Agjencisë si palë përfundimtare që i takon ueb-faqja. Në Agjencinë për rini dhe sport janë angazhuar të gjithë të punësuarit për plotësim të ueb-faqes me materiale, dhe kjo procedurë tashmë është gati se në përfundim. Në ditët në vijim pritet që të realizohet takimi i fundit rreth publikimit të ueb-faqes, ku më pas do të vendoset data për publikimin zyrtar të ueb-faqes”, thanë nga ARS-ja.
Nga atje përmes një fotografie treguan se si do të duket version shqip i ueb-faqes.
Nga misioni i OSBE-së në Shkup sot nuk u përgjigjën në pyetjet gazetareske të Portalb.mk për këtë rast.
Rikujtojmë që Agjencia për Rini dhe Sport para se të publikohej ueb-faqja e përkohshme nëntorin e kaluar nuk kishte version në shqip në ueb-faqen paraprake.
Edhe pse kanë kaluar dy vite nga hyrja në fuqi e Ligjit për Përdorimin e Gjuhëve në Maqedoninë e Veriut, zbatimi i të njëjtit është shumë i zbehtë në praktikë.
- LEXO: Ueb-faqja e përhershme e ARS-së ende nuk është gati në shqip, vazhdimisht shtyhen afatet
- LEXO: Pas disa lajmeve të Portalb, ARS-ja e lëshoi në përdorim ueb-faqen e përkohshme në shqip
- LEXO: Ende nuk është gati ueb-faqja në shqip e Agjencisë për Rini dhe Sport, përkundër premtimeve të zëvendës-drejtorit Rustemi
- LEXO: Shkoi vera, erdhi dhe vjeshta Agjencia për Rini dhe Sport ende nuk e ka gati ueb-faqen në shqip
- LEXO: Agjencia për Rini dhe Sport thotë se ka arritur donacioni nga OSBE: Pas pesë javësh do të jetë gati ueb-faqja në shqip
- LEXO: Agjencia për Rini dhe Sport ende s’e ka gati ueb-faqen në gjuhën shqipe, pret donacion nga OSBE-ja
- LEXO: As zëvendës drejtorët shqiptar as ligji, nuk kanë arritur të obligojnë Agjencinë për Rini dhe Sport të përktheje ueb faqen
- LEXO: RMV, zbatimi i Ligjit të Gjuhëve sipas dëshirës së institucioneve