fbpx

SAShK dhe MASh sot në takim të ri negociator

Pas takimit të para dy ditëve, Sindikata e Arsimit, Shkencës dhe Kulturës (SASHK) dhe Ministria e Arsimit (MASH), sot pasdite duhet të kenë një takim të ri negociator për të diskutuar për rritjen në përqindje të pagave të punëtorëve në sektorin e arsimit, transmeton Portalb.mk.

Pas takimit të fundit të SASHK-ut dhe Ministrisë së Arsimit dhe Shkencës, Sindikata njoftoi se në takimin e caktuar për sot pret të arrihet përafrim i qëndrimeve për këtë çështje, si dhe për marrëveshjen kolektive për arsimin fillor dhe të mesëm dhe afati kohor për përgatitjen, nënshkrimin dhe aplikimin e tyre.

Takimi i ri i SASHK-ut dhe Ministrisë së Punës dhe Politikës Sociale për çështje të hapura në fushën e mbrojtjes së fëmijëve, nga ana tjetër, është caktuar për më 17 maj, pasi në takimin e djeshëm të dy palët biseduan për formimin e grupit punues për marrëveshje të re kolektive për institucionet parashkollore, pasi vlefshmëria e aktualit skadon në qershor.

Pas takimit të djeshëm me SASHK-un, MPPS-ja ka bërë të ditur se është diskutuar edhe për kërkesat që janë pjesë e vendimit për grevë të punëtorëve në çerdhe dhe për çështjen e pagave të punëtorëve gjatë grevës.

Takimet negociuese të sindikatës me dy ministritë po zhvillohen si pjesë e një periudhe shtesë dhjetëditore të pajtimit, pasi dhjetë ditët e para për zgjidhjen paqësore të mosmarrëveshjes me një ndërmjetës skaduan të dielën.

Për përkujtim, greva e përgjithshme në shkolla dhe kopshte në vend, e cila filloi më 11 prill, u ndërpre më 28 prill kur SASHK-u u njoftua nga MPPS për dispozitën ligjore prej maksimumi 20 ditësh për pajtim me ndërmjetësimin e një pajtues.

Kreu i SASHK-ut, Jakim Nedelkov, atëherë paralajmëruar se greva do të riaktivizohet nëse nuk i harmonizojnë qëndrimet e tyre me ministritë resore për kërkesat e tyre.

Sindikata organizoi grevën duke kërkuar që pagat në sektorin e arsimit dhe mbrojtjes së fëmijëve të rriten menjëherë për 18.4 për qind, gjegjësisht të jenë në përputhje me rritjen e pagës minimale dhe po ashtu paga minimale të jetë bazë me të cilën do të vendosen koeficientët e kompleksitetit të vendeve të punës. Përveç rritjes në përqindje të pagave, në tryezën e negociatave janë edhe marrëveshjet kolektive në aktivitetet që mbulon Sindikata.

SASHK-u fillimisht e hodhi poshtë kategorikisht rritjen prej 10 për qind të pagave të punëtorëve në çerdhe dhe institucione arsimore, ndërsa anëtarësia sindikale nuk e pranoi as rritjen prej 12 për qind të ofruar nga Qeveria.

Lajme të ngjashme

Leave a Reply

Your email address will not be published. Required fields are marked *

Back to top button