Qyteti i Shkupit: Në parkun e qytetit mbrëmë nuk ka pasur drita për shkak të vandalizmit, dikush qëllimisht ka fikur siguresat
Parku i qytetit në Shkup dje ishte në errësirë pasi dikush i ka thyer kutitë e energjisë elektrike dhe i ka fikur siguresat, thonë nga Qyteti i Shkupit, transmeton Portalb.mk.
Mbrëmë në park nuk ishte ndezur asnjë dritë, rrugicat ishin krejtësisht të errëta. E vetmja dritë në park ishte ndriçimi i skenës për koncertin e Duka Bojaxhiev të organizuar me rastin e Ditës së Evropës. Qytetarëve iu desh të ecnin në errësirë për të arritur në vedin ku po mbahej koncerti.
Siç njoftojnë nga Qyteti i Shkupit, ekipet kompetente të qytetit dolën menjëherë në terren për kontroll dhe riparuan problemin brenda 15 minutash.
“Gjatë kontrollit është konstatuar se autorë të panjohur kanë hapur me dhunë kutitë për energji elektrike në Kopshtin Zoologjik Shkup dhe afër monumentit të Goce Delçevit dhe kanë fikur siguresat. Në lidhje me këtë është vepruar menjëherë dhe është ndezur energjia elektrike për ndriçimin e Parkut të Qytetit”, thuhet në njoftimin e Qytetit të Shkupit.
Qyteti i Shkupit dënon ashpër veprime të tilla duke u bërë thirrje qytetarëve që të mos i hapin me dhunë kutitë për energji elektrike, sepse rrezikojnë rrjetin e energjisë elektrike dhe sigurinë e vizitorëve në parkun e qytetit.
Shërbimet e Qytetit të Shkupit me rastin e këtij vandalizmi njoftuan MPB-në dhe presin reagimin e duhur nga ana e institucioneve kompetente.
