Dita 70: Putin i vendosi kushte Perëndimit për fundin e luftës
Presidentja e Komisionit Evropian Ursula von der Leyen ka paraqitur detajet e një pakete tjetër sanksionesh kundër Rusisë që do të bien dakord nga vendet e BE-së në ditët në vijim. Von der Leyen tha se blloku po i jepte fund varësisë së tij nga nafta ruse – me vendosjen e embargos deri në fund të vitit. Ajo pranoi se nuk do të jetë e lehtë, pasi disa vende ishin të varura nga importe të tilla. Hungaria ka kundërshtuar embargon ndaj karburanteve ruse. Nuk ka asnjë konsensus midis 27 anëtarëve të BE-së për ndalimin e përdorimit të gazit natyror rus – karburant i cili akoma nuk është shënjestruar nga sanksionet e BE-së, transmeton Portalb.mk.
18:20 – Putin i vendosi kushte Perëndimit për fundin e luftës
Presidenti rus Vladimir Putin, ka thënë se Perëndimi mund të ndihmojë në përfundimin e luftës në Ukrainë duke ushtruar më shumë presion mbi Presidentin Volodymyr Zelensky dhe duke ndaluar dërgesat e armëve në Ukrainë.
Putin i bëri këto deklarata gjatë një bisede telefonike me Presidentin e Francës, Emmanuel Macron. Udhëheqësi francez përsëri bëri thirrje për një armëpushim dhe për bisedime për t’i dhënë fund luftës së shkaktuar nga pushtimi rus.
Ai i kërkoi Putinit të lejojë evakuime të mëtejshme në qytetin e Mariupolit. Qindra civilë besohet se mbetën të bllokuar nën rrënojat e një punishteje çeliku të mbajtur nga forcat ukrainase.
Shtetet perëndimore e kanë armatosur gjerësisht Ukrainën në luftën e saj kundër Rusisë dhe të martën Mbretëria e Bashkuar njoftoi një furnizim të ri me pajisje ushtarake që arrijnë vlerën e 300 milionë paund, duke përfshirë automjete të blinduara, një sistem radar, bllokues GPS dhe pajisje për shikim natën.
Mijëra njerëz, si ushtarë ashtu edhe civilë, janë vrarë ose plagosur që nga pushtimi më 24 shkurt dhe më shumë se 5.5 milionë persona janë larguar jashtë vendit si refugjatë. Forcat ruse janë tërhequr nga rajoni i kryeqytetit Kiev për të fokusuar operacionet e tyre në Ukrainën lindore.
Duke bërë thirrje për ndalimin e furnizimeve me armë, Putin akuzoi forcat ukrainase për kryerjen e krimeve të luftës duke bombarduar qytete në Ukrainën lindore ku separatistët e mbështetur nga Moska kontrollojnë zona të mëdha, sipas një deklarate të Kremlinit.
Sipas një deklarate të Pallatit Elysee, Macron i bëri thirrje Putinit t’i jepte fund luftës dhe tha se ishte i gatshëm të ndihmonte në arritjen e një zgjidhjeje të negociuar të konfliktit që respektonte sovranitetin e Ukrainës, shkruan BBC.
Presidenti francez, i cili fitoi rizgjedhjen muajin e kaluar, ka folur me Putin disa herë që nga pushtimi i Ukrainës nga Rusia.
09:45 – Von der Leyen propozoi embargo mbi naftën ruse
Presidentja e Komisionit Evropian, Ursula von der Leyen, zbuloi planin e bllokut evropian për të ndalur importet e naftës ruse nga fundi i vitit, si pjesë e pakos së re të sanksioneve të BE-së kundër Moskës.
Ndalesa ka për qëllim “presionin maksimal” ndaj Rusisë, tha von der Leyen gjatë një debati në Parlamentin Evropian.
Sipas saj, kjo do të bëhet me një gradualisht për të ruajtur stabilitetin ekonomik të Bashkimit Evropian.
Ajo tha se heqja dorë nga nafta ruse nuk do të jetë e lehtë, “por ne thjesht duhet ta bëjmë”. Von der Leyen po ashtu tha se në një periudhë gjashtëmujore do të hiqet dorë nga nafta e papërpunuar dhe produktet e rafinuara.
Von der Leyen po ashtu njoftoi për largimin e bankës më të madhe ruse, Sberbank, nga sistemi ndërkombëtar i komunikimit financiar, SWIFT.
Në pakon e gjashtë të sanksioneve, që pritet të miratohet në ditët në vijim, do të jenë edhe zyrtarët ushtarakë të përfshirë në mizoritë e kryera në Buça dhe Mariupol, tha von der Leyen.
Po ashtu, zyrtarja e lartë e BE-së tha se tre media shtetërore ruse do të largohen nga transmetimet në BE, pasi sipas saj, këto janë “megafonë të gënjeshtrave të Putinit”.
Sanksionet e paralajmëruara nga BE-ja vijnë teksa forcat ruse po godasin objektiva në lindje të Ukrainës, duke sulmuar me raketa fabrikën e çelikut në Mariupol, që është pika e fundit e rezistencës.
Dhjetëra banorë kanë arritur të largohen nga Mariupoli përmes një operacioni evakuimi të Kombeve të Bashkuar dhe Kryqit të Kuq dhe të martën janë dërguar në Zaporizhja, që kontrollohet nga Ukraina. Civilët kishin qenë të strehuar për javë të tëra në bunkerët nën fabrikën e çelikut, Azovstal.
Në mesin e të evakuarve kryesisht kishte gra dhe fëmijë, të cilët u larguan nga Mariupoli përmes autobusëve.
“Ne i kishim thënë lamtumirë jetës. Nuk mendonim se dikush e dinte se ne ishim atje”, tha Valentina Sytnykova, 70 vjeçe, e cila ishte strehuar në fabrikë për dy muaj së bashku me djalin e saj dhe mbesën 10-vjeçare.
Rusia po e sulmon Mariupolin pasi po kërkon që ta shkëpusë Ukrainën nga Deti i Zi dhe ta lidhë territorin e kontrolluar nga Rusia në jug dhe lindje. Pjesë të rajoneve lindore të Donjeckut dhe Luhanskut kishin qenë nën kontrollin e separatistëve pro-rusë, para se presidenti Vladimir Putin, të niste pushimin e Ukrainës më 24 shkurt.
Mbi 200 civilë vazhdojnë të jenë në fabrikën e Azovstalit, ka thënë kryetari i Mariupolit, Vadym Boichenko, teksa 100,000 civilë vazhdojnë të jenë në qytetin-port që është shndërruar në gërmadhë.
Moska nuk ka shfaqur asnjë shenjë se do të tërhiqet edhe pothuajse dhjetë javë pasi ka nisur, atë që e cilëson si “operacion të posaçëm ushtarak”, luftë që ka vrarë mijëra persona, ka shkatërruar qytete dhe ka detyruar 5 milionë ukrainas të largohen nga vendi.
Ekonomia e Rusisë prej 1.8 trilion dollarësh po shkon drejt tkurrjes së saj më të madhe që nga vitet pas shpërbërjes së Bashkimit Sovjetik më 1991. Putin po ashtu ka njoftuar për planet ruse për të bllokuar eksportet e lëndës së parë, për mbështetësit e Kievi.
Sulmet ruse mbi hekurudhat
Forcat ruse kanë përqendruar ofensivën e tyre në lindje dhe jug të Ukrainës, pasi kanë dështuar që ta marrin kryeqytetin ukrainas, Kiev.
Të martën po ashtu janë raportuar për sulme të reja në perëndim të Ukrainës. Kryetari i Lvivit ka thënë se raketat ruse kanë dëmtuar rrjetet elektrike dhe ato të ujit në këtë qytet që gjendet në kufi me Poloninë dhe që po përdoret për të marrë furnizimet me armë që Perëndimi po i dërgon ushtrisë ukrainase.
Forcat ruse po ashtu kanë sulmuar gjashtë stacione hekurudhore në Ukrainën qendrore dhe perëndimore, tha kreu i hekurudhave, Olesksandr Kamyshin. Ai përmes një postimi në Twitter tha se nuk ka civilë të vrarë e as të plagosur.
Në lindje, sulmet ruse në Donjeck kanë vrarë 21 civilë dhe 27 të tjerë janë plagosur, tha guvernatori rajonal, Pavlo Kyrylenko. Ai tha se kjo është shifra më e lartë e viktimave që prej muajit të kaluar.
Sulmet dhe granatimet janë intensifikuar edhe në Luhansk dhe zona më e goditur është Popasna, ku ka qenë e pamundur të organizohet evakuimi, tha guvernatori rajonal, Serhiy Haida.
Ndërkaq, presidenti ukrainas, Volodymyr Zelensky, tha se ushtria ruse “ka reaguar sot me zemërim të madh ndaj suksesit tonë”.
“Shkalla e lartë e granatimeve të sotme nuk tregon qartë se Rusia ka ndonjë lloj të veçantë të qëllimit ushtarak”, tha ai gjatë një adresimi drejtuar kombit mbrëmjen e së martës.
Rusia po ashtu ka sulmuar me raketa një aeroport ushtarak në afërsi të Odesës, duke shkatërruar dronë, armë dhe furnizime me municion që i janë dhënë Ukrainës nga Perëndimi. Ukraina tha se tre sulme me raketa, që kishin për cak rajonin e Odesës, janë penguar.
