Ligji i ri për inspektim në mjedisin jetësor është miratuar, duhet të sigurojë kontrolle më efikase të ndotësve

Ligji për inspektim në mjedisin jetësor, pas disa vitesh vonesë, dje më në fund u miratua në Kuvend. Ligji i ri, i hartuar nga Ministria e Mjedisit dhe Planifikimit Hapësinor, duhet të sigurojë reformim, organizim dhe bashkëpunim më të mirë të shërbimeve të inspektimit në nivel qendror dhe lokal, që duhet të rezultojë në mbrojtje më të mirë dhe më efikase të mjedisit jetësor, transmeton Portalb.mk.

Nga Ministria janë të kënaqur që ligji është miratuar përfundimisht dhe theksojnë se elementet kryesore të aktit të ri ligjor synojnë vendosjen e planifikimit të koordinuar të inspektimeve në të gjithë territorin e vendit.

“Me miratimin e këtij ligji do të sigurojë planifikim shumëvjeçar të inspektimeve mjedisore i cili do të sigurojë tejkalimin e sfidave aktuale me burimet njerëzore, planifikimin e duhur të inspektimeve në nivel qendror dhe lokal në përputhje me politikat mjedisore dhe procedura më të detajuara për mbikëqyrje urgjente dhe të jashtëzakonshme“, njoftuan nga Ministria.

Inspektorati Shtetëror dhe shërbimet inspektuese komunale do të duhet të hartojnë së bashku një Strategji dhe Program për inspektimin mjedisor në nivel qarku dhe jo në nivel të shërbimit inspektues. Kjo duhet të mundësojë koordinimin dhe bashkëpunimin e pushtetit qendror me atë lokal lidhur me planifikimin, i cili duhet të mundësojë shmangien e mbivendosjeve në inspektim, por mosmbulimin me kontrolle në media dhe fusha të caktuara.

“Në ligj është inkorporuar bashkëpunimi ndërkomunal në drejtim të specializimit të inspektorëve për fusha të caktuara apo media në mjedisin jetësor, të cilat mund të përmirësojnë ndjeshëm situatën me burimet njerëzore në inspektime”, informuan nga ministria.

Njëkohësisht, saktësohen dispozitat për kryerjen e kontrolleve të jashtëzakonshme, mundësitë dhe mënyra e marrjes së mostrave në rrethana të jashtëzakonshme dhe urgjente, si dhe parashikohet detyrim i veçantë shtesë për përgatitjen e raporteve për lloje të caktuara instalimesh në përputhje me kërkesat e legjislacionit të BE-së. Këto vendime synojnë edhe dhënien e provave përkatëse për mënyrën e funksionimit të subjekteve të mbikëqyrjes, për kundërvajtje të mundshme të mëtejshme apo procedura të tjera.

Nga ana tjetër, Këshilli inspektues qytetar dhe Aleanca “Razbistri se” kanë reaguar së fundmi pasi asnjë nga 23 amendamentet e tyre të propozuara në Projektligj nuk është pranuar. Koalicionet, pas së cilave qëndrojnë 35 organizata të shoqërisë civile, institucione të arsimit të lartë dhe ekspertë, kërkuan që inspektorët të kenë pajisje dhe të kryejnë matjet treguese të ndotësve dhe të monitorojnë punën e inspektorëve lokal që duhet kryer nga Inspektorati Shtetëror dhe Këshilli i Inspektimit, dhe jo komisioni në Ministrinë e Mjedisit.

Ligji i ri nuk përfshin propozimin që inspektorët të përdorin lista kontrolli të detyrueshme, të publikojnë në faqen e internetit bazë të dhënash me akte inspektimi me mundësi kërkimi sipas parametrave të ndryshëm, si dhe të kenë sanksione kundërvajtëse nëse aktet e inspektimit nuk publikohen, paralajmërime, zgjidhje, raporte, plane dhe programe strategjike dhe mujore.