DITA 52: Ukraina: Ushtria ruse ka humbur 20.100 ushtarë
Rusia tha se ua ka ndaluar hyrjen në shtet kryeministrit britanik, Boris Johnson dhe disa ministrave të tjerë britanikë, pasi Britania ka vendosur masa që kanë për qëllim të izolojnë Moskën për shkak të luftës së paprovokuar ndaj Ukrainës. Shpërthime u dëgjuan në qytetet e Kievit dhe Lvivit në mëngjesin e 16 prillit, pas paralajmërimeve nga Rusia se do të intensifikojë sulmet në kryeqytetin ukrainas. Moska ka kërcënuar se do ta sulmojë Kievin, ka akuzuar trupat ukrainase se kanë shënjestruar qytetet kufitare ruse. Zëvendëskryeministrja e Ukrainës, Iryna Vereshchuk, tha se janë pajtuar me Rusinë që të hapen nëntë korridore humanitare, në mënyrë që të mund të evakuohen civilët nga disa qytete, përfshirë edhe nga Maripoli, njofton Portalb.
23:45 – Ukraina: Ushtria ruse ka humbur 20.100 ushtarë
Ushtria ruse që i ka shpallur luftë Ukrainës ka humbur 20.100 ushtarë, 163 avionë, 145 helikopterë dhe 762 tanke, transmeton Anadolu Agency (AA).
Shtabi i Përgjithshëm i Ukrainës ka ndarë të dhënat lidhur me humbjet e ushtrisë ruse për periudhën 24 shkurt – 16 prill.
Sipas kësaj, nga ushtria ruse që sulmon Ukrainën janë vrarë 20.100 ushtarë si dhe janë rrëzuar 163 avionë, 145 helikopterë ndërsa janë shkatërruar 762 tanke, 1.982 mjete të blinduara, 371 topa, 125 sisteme raketahedhëse dhe 66 sisteme të mbrojtjes ajrore që u përkasin rusëve.
Forcat ruse po ashtu kanë humbur 1.458 automjete, 8 anije dhe skafe të lehta shpejtësie, 76 mjete të karburantit dhe 138 mjete ajrore pa pilot (dronë).
Ministria ruse e mbrojtjes në një deklaratë më 25 mars kishte njoftuar se në Ukrainë kanë humbur jetën 1.351 ushtarë rusë.
13:00 – Rusia ia ndalon hyrjen Johnsonit dhe zyrtarëve të tjerë britanikë
Rusia tha se ua ka ndaluar hyrjen në shtet kryeministrit britanik, Boris Johnson, sekretares së Jashtme, Liz Truss, dhe disa ministrave të tjerë britanikë, pasi Britania ka vendosur masa që kanë për qëllim të izolojnë Moskën për shkak të luftës së paprovokuar ndaj Ukrainës.
Ministria e Jashtme ruse tha më 16 prill se masat, që janë miratuar në koordinim me Shtetet e Bashkuara, Bashkimin Evropian dhe aleatët e tjerë, po “ngufasin” ekonominë e brendshme.
Rusia njoftoi se në listën e ndalesës janë 13 zyrtarë britanikë, përfshirë edhe ish-kryeministren, Theresa May. Moska paralajmëroi se kjo listë do të zgjerohej “në një të ardhme të afërt”.
Sanksionet perëndimore, të miratuara që prej se Moska nisi pushtimin e Ukrainës më 24 shkurt, janë vendosur ndaj zyrtarëve rusë, përfshirë edhe presidentin rus, Vladimir Putin dhe familjen e tij, por edhe ndaj kompanive dhe oligarkëve rusë që shihen si të afërt me udhëheqjen e shtetit.
12:07 – Ukraina thotë se do të hapen nëntë korridore humanitare
Zëvendëskryeministrja e Ukrainës, Iryna Vereshchuk, tha se janë pajtuar me Rusinë që të hapen nëntë korridore humanitare, në mënyrë që të mund të evakuohen civilët nga disa qytete, përfshirë edhe nga Maripoli.
Përmes një deklarate të postuar në Telegram, Vereshchuk tha se pesë rrugë evakuimesh do të hapen në rajonin e Luhanskut, në lindje të Ukrainës, zonë në të cilën Rusia tashmë ka përqendruar operacionet e saj ushtarake.
“Korridoret humanitare në rajonin e Luhanskut do të funksionojnë në bazë të ndërprerjes së granatimeve nga forcat ruse”, tha ajo.
Ajo shtoi se korridoret nga Berdijanska, Tokmaku, Mariupoli dhe Enerhodari do të jenë të qasshme vetëm nga transporti privat.
Ukraina thotë se dhjetëra-mijëra persona besohet se janë vrarë në Mariupol dhe e ka akuzuar Rusinë se po bllokon përpjekjet e konvojeve të ndihmës, që po tentojnë të ndihmojnë civilët të cilët janë të bllokuar në qytet për javë të tëra.
Autoritetet ukrainase u kanë bërë thirrje civilëve në pjesën lindore të vendit që të largohen, teksa forcat ruse kanë intensifikuar ofensivën e tyre në këtë rajon.
11:40 – Shpërthimet godasin Kievin dhe Lvivin
Shpërthime u dëgjuan në qytetet e Kievit dhe Lvivit në mëngjesin e 16 prillit, pas paralajmërimeve nga Rusia se do të intensifikojë sulmet në kryeqytetin ukrainas. Moska ka kërcënuar se do ta sulmojë Kievin, ka akuzuar trupat ukrainase se kanë shënjestruar qytetet kufitare ruse.
Kryetari i Kievit, Vitali Klitschko, tha se shpërthimet goditën qarkun Darnitski, që gjendet në periferi të qytetit, ndërkaq, guvernatori i Lvivit, Maksym Kozytskyi, tha sulmet kanë ndodhur në orën 05:46 dhe 07:02, sipas kohës lokale, por nuk dha më shumë detaje.
Përveç në Kiev dhe Lviv, sirenat për sulme ajrore janë dëgjuar në shumë pjesë të Ukrainës në orët e mëngjesit, teksa shteti po përgatitet edhe për një ditë të luftimeve, pasi Rusia nisi pushtimin e paprovokuar më 24 shkurt.
Presidenti ukrainas, Volodymyr Zelensky, gjatë adresimit në orët e vona të 15 prillit tha sanksionet ndërkombëtare ndaj Rusisë do të përcaktojë se sa do të zgjasë kjo luftë.
“Suksesi i ushatrisë sonë në fushëbetejë veçse ka qenë i rëndësishëm. Historikisht i rëndësishëm. Por, ende nuk është i mjaftueshëm që të largojmë nga toka jonë forcat pushtuese”, tha ai.
“Sanksionet kundër Rusisë janë shumë serioze, janë të dhimbshme në aspektin ekonomik. Por, nuk janë të mjaftueshme për të parandaluar makinerinë ushtarake të Rusisë. Ne duhet të promovojmë sanksione më të forta, më shkatërruese. Kjo do të përcaktojë se sa do të zgjasë kjo luftë”, shtoi ai.
Ndërkaq, Zelensky, duke folur për CNN-in, tha se midis 2,500 dhe 3,000 ushtarë ukrainas kanë vdekur deri më tani, ndërkaq afër 10,000 të tjerë janë plagosur në beteja. Ai tha se nuk ka të dhëna për numrin e civilëve të vrarë.
Më 15 prill, policia kishte thënë se mbi 900 trupa civilësh u gjetën në rajonin e Kievit, pas tërheqjes së trupave ruse.
“Është e vështirë të flitet për civilët, pasi jugu i shtetit tonë, ku qytetet janë të bllokuara – Hersoni, Berdijanska, Mariupoli më tej në lindje dhe zonat në lindje ku gjendet Volnovaha – ne thjesht nuk e dimë se sa njerëz kanë vdekur në atë zonë që është e bllokuar”, tha Zelenksy.
Sa i përket numrit të ushtarëve rusë të vrarë ai vlerësoi se ishin afër 19,000 deri në 20,000. Rusia deri më tani ka pranuar se i janë vrarë 1,350 ushtarë.
Asnjëra prej këtyre shifrave nuk mund të verifikohet në mënyrë të pavarur. Inteligjenca perëndimore ka vlerësuar se disa mijëra ushtarë janë vrarë në palën ruse.
- Dita 1, lexo KËTU
- Dita 2, lexo KËTU
- Dita 3, lexo KËTU
- Dita 4, lexo KËTU
- Dita 5, lexo KËTU
- Dita 6, lexo KËTU
- Dita 7, lexo KËTU
- Dita 8, lexo KËTU
- Dita 9, lexo KËTU
- Dita 10, lexo KËTU
- Dita 11, lexo KËTU
- Dita 12, lexo KËTU
- Dita 13, lexo KËTU
- Dita 14, lexo KËTU
- Dita 15, lexo KËTU
- Dita 16, lexo KËTU
- Dita 17, lexo KËTU
- Dita 18, lexo KËTU
- Dita 19, lexo KËTU
- Dita 20, lexo KËTU
- Dita 21, lexo KËTU
- Dita 22, lexo KËTU
- Dita 23, lexo KËTU
- Dita 24, lexo KËTU
- Dita 25, lexo KËTU
- Dita 26, lexo KËTU
- Dita 27, lexo KËTU
- Dita 28, lexo KËTU
- Dita 29, lexo KËTU
- Dita 30, lexo KËTU
- Dita 31, lexo KËTU
- Dita 32, lexo KËTU
- Dita 33, lexo KËTU
- Dita 34, lexo KËTU
- Dita 35, lexo KËTU
- -Dita 36, lexo KËTU
- Dita 37, lexo KËTU
- Dita 38, lexo KËTU
- Dita 39, lexo KËTU
- Dita 40, lexo KËTU
- Dita 41, lexo KËTU
- Dita 42, lexo KËTU
- Dita 43, lexo KËTU
- Dita 44, lexo KËTU
- Dita 45, lexo KËTU
- Dita 46, lexo KËTU
- Dita 47, lexo KËTU
- Dita 48, lexo KËTU
- Dita 49, lexo KËTU
- Dita 50, lexo KËTU
- Dita 51, lexo KËTU