Mjekja ukrainase në profilin e Instagramit të David Beckham ka shpërndarë video nga situata në Kharkov (VIDEO)
Ish-futbollisti David Beckham ia ka dorëzuar llogarinë e tij të Instagramit një mjekes ukrainase që punon në qytetin e Kharkovit. Gjatë ditës së djeshme, përmbajtja e tij në “Story” u vërshua me video dhe foto që ndiqnin Irinën, mjeke anesteziologe pediatrike dhe drejtuese e Qendrës Rajonale Perinatale. Ndjekësit e panë punën e saj gjatë një dite për të treguar se me çfarë përballen mjekët në këtë periudhë lufte, shkruan The Guardian, transmeton Portalb.mk.
Irina u tregoi fansave të Beckhamit, llogaria e të cilit në Instagram ka mbi 71.6 milionë ndjekës, bodrumin e ngushtë ku u evakuuan të gjitha gratë shtatzëna dhe nënat gjatë ditës së parë të pushtimit rus. Ajo postoi foto të të porsalindurve në repartin e kujdesit intensiv, duke u mbështetur në gjeneratorët e oksigjenit të dhuruar nga UNICEF.
Në një nga videot e shkurtra, Irina ka regjistruar edhe nënën e re Jana, duke mbajtur në krahë djalin e saj Mihailo, i cili ka lindur me probleme në frymëmarrje dhe të cilit i është shkatërruar shtëpia nga bombardimet.
David Beckham, ambasador i UNICEF-it që nga viti 2005, u bëri thirrje ndjekësve të tij që të dhurojnë bamirësi me bazë në Ukrainë për të siguruar ujë të pastër dhe ushqim për familjet dhe për të ofruar objekte për mbrojtjen e fëmijëve.
“Falë donacioneve tuaja, gjeneratorët e oksigjenit që ata marrin po i ndihmojnë të sapolindurit të mbijetojnë në këto kushte të tmerrshme”, tha Beckham në një video në llogarinë e tij në Instagram përpara se t’ia dorëzonte mjekes.
Kharkovi, qyteti i dytë më i madh i Ukrainës, ka qenë një objektiv i vazhdueshëm i granatimeve ruse për tre javë.
