MB: Ka prova shumë të forta se Putin qëndron prapa krimeve të luftës në Ukrainë

F. Xh. 20:42, 17-03-2022

Mbretëria e Bashkuar tha se ka “prova shumë, shumë të forta” të përfshirjes së presidentit rus Vladimir Putin në krime lufte në Ukrainë, transmeton Anadolu Agency (AA).

Duke folur për BBC, Sekretarja e Jashtme britanike Liz Truss tha se provat sugjerojnë se “krime lufte janë kryer” në Ukrainë dhe se “Vladimir Putin është pas tyre”.

Komentet e saj erdhën një ditë pasi presidenti amerikan Joe Biden e quajti Putinin “kriminel lufte”, deklaratë që Kremlini e cilësoi si “të pafalshme”.

“Përfundimisht është një çështje që i takon Gjykatës Ndërkombëtare Penale të vendosë se kush është apo jo kriminel lufte dhe ne të sjellim provat”, shtoi Truss.

Më shumë se tre milionë njerëz kanë ikur nga Ukraina, prej kur presidenti rus, Vladimir Putin, urdhëroi pushtimin e Ukrainës më 24 shkurt. Putin ka urdhëruar “operacion special” për të çmilitarizuar Ukrainën. Veprimi i Kremlinit ka nxitur zemërim dhe është dënuar në shumë vende të botës. Sot është dita e 22 që nga fillimi i agresionit rus.