MPJ me thirrje ndaj qytetarëve të vendit në Ukrainë: Drejtohuni në Odesa, ka ende korridore aktive të evakuimit

“Ju informojmë se jemi në kontakt të vazhdueshëm me Autoritetet e Rumanisë dhe Hungarisë, nga ku është realizuar bashkëpunim dhe mundësuar ndihmë për shtetasit tanë që ndodhen në Ukrainë. Qytetarët që kanë mundësi duhet të shkojnë në pjesën perëndimore të Ukrainës, në konsullatat e Rumanisë në Solotvino dhe Çernauti, si dhe në Konsullatat e Hungarisë në Uzgorod, Beregove dhe Mukaçevo. Njoftojmë se në këto lokacione do t’u ofrohet ndihmë shtesë në drejtim të evakuimit të tyre nga Ukraina përmes këtyre vendeve. Jemi në kontakt të vazhdueshëm me autoritetet në Moldavi, nga ku poashtu kemi marrë edhe konfirmimin për kyçjen e qytetarëve tanë në korridoret eventuale të tyre për evakuim”, informon MPJ.

Ministria e Punëve të Jashtme njofton mes të tjerash se është në komunikim të vazhdueshëm me të gjithë partnerët dhe po punohet për sigurimin e korridoreve/kolonave të tjera të sigurisë. Lidhur me këtë, informojnë se është aktivizuar mekanizmi i BE-së për mbrojtje civile, ndërsa Ministria e Punëve të Jashtme do të informojë në mënyrë shtesë për korridoret e reja.

Shtetasit tanë që nuk kanë lënë ende të dhënat e tyre, duhet ta kontaktojnë menjëherë Ministrinë e Punëve të Jashtme, për të dorëzuar të dhëna dhe informacione të sakta për vendndodhjen dhe gjendjen e tyre, në mënyrë që të mund të jenë pjesë e koordinimit të procesit të evakuimit.

Kujtojmë se numri i linjës telefonike +389 75 273 732 është vazhdimisht aktiv.