fbpx

Ambasadori rus: Rusia nuk brengoset për sanksione

Moska nuk brengoset për rrezikun e sanksioneve perëndimore nëse do të pushtonte Ukrainën, tha ambasadori i Rusisë në Suedi për një gazetë suedeze, transmeton REL.

“Më falni për gjuhën time, por neve nuk na interesojnë sanksionet e tyre”, tha Viktor Tatarintsev, për gazetën Aftonbladet në një intervistë të postuar të shtunën vonë.

“Ne kemi pasur tashmë kaq shumë sanksione dhe në këtë kuptim ato kanë pasur një efekt pozitiv në ekonominë dhe bujqësinë tonë,” tha diplomati veteran, i cili flet rrjedhshëm suedisht dhe është dërguar katër herë në vendin skandinav.

“Ne jemi më të vetë-mjaftueshëm dhe kemi mundur të rrisim eksportet tona. Ne nuk kemi djath italian apo zviceran, por kemi mësuar të bëjmë djathëra rusë po aq të mirë duke përdorur receta italiane dhe zvicerane”, tha ai.

Ai shtoi se “sanksionet e reja nuk janë asgjë pozitive, por jo aq të këqija sa e thotë Perëndimi”.

Tatarintsev akuzoi Perëndimin se nuk e kuptonte mentalitetin rus.

“Sa më shumë Perëndimi ta shtyjë Rusinë, aq më e fortë do të jetë përgjigja ruse,” tha ai.

Komentet e diplomatit vijnë pasi shtetet perëndimore kanë frikë se Moska po përgatit një pushtim të Ukrainës, pasi pothuajse ka rrethuar fqinjin e saj perëndimor me më shumë se 100,000 trupa.

Uashingtoni ka paralajmëruar se një pushtim i gjithanshëm mund të fillojë “çdo ditë”.

Tatarintsev këmbënguli se Moska po përpiqej të shmangte një luftë.

“Kjo është dëshira më e sinqertë e lidershipit tonë politik. Gjëja e fundit që njerëzit në Rusi duan është lufta”, tha ai.

Mes rritjes së tensioneve, Kremlini ka kërkuar që NATO të kufizojë aktivitetet në Evropën Lindore dhe të premtojë se nuk do të shtojë asnjë republikë të mëparshme sovjetike – si Ukraina – si anëtarë të rinj.

Në përgjigje të krizës, vendet e NATO-s kanë vendosur trupa dhe pajisje për anëtarët e tjerë, shtetet që ndajnë një kufi me Ukrainën.

Kujtojmë se, Rusia ka grumbulluar më shumë se 100,000 trupa në kufi me Ukrainën, duke e rrethuar atë nga tre anë, në Krime në jug, në anën ruse të kufirit dhe në Bjellorusi në veri.  Në zonën kufitare, Moska ka zhvilluar një sërë stërvitjesh ushtarake, duke rritur shqetësimin se mund të jetë duke u përgatitur për një sulm të ri, pasi Rusia më 2014 pushtoi Gadishullin ukrainas të Krimesë. Por Rusia deri më tani mohon të pushtojë Ukrainën. Shumë vende përfshirë SHBA-të, Britaninë e Madhe, Gjermaninë, Francën, RMV-në, Shqipërinë dhe të tjera u kanë bërë thirrje shtetasve të tyre të largohen nga Ukraina.

Lajme të ngjashme

Leave a Reply

Your email address will not be published. Required fields are marked *

Back to top button