RMV, Shaqiri digjitalizimi i teksteve do të realizohet për pesë vjet
Ministri i ri i Arsimit, Jeton Shaqiri, i cili më parë ka drejtuar Ministrinë e Shoqërisë Informatike dhe Administratës, e cila ka kohë që po zbaton digjitalizimin në administratën publike, ka bërë të ditur se digjitalizimi i filluar i teksteve në arsim do të jetë një proces që do të realizohet për pesë vjet, raporton SlobodenPecat, transmeton Portalb.mk.
“Ofrohen tekste digjitale për nxënësit nga klasa e katër e tutje. Duhet të merren në konsideratë disa aspekte. E para do të jetë përmbajtja, gjegjësisht do të duhet të shqyrtohet nëse përmbajtja e programit dhe teksteve shkollore është e kënaqshme në zbatimin e deritanishëm, por nga ana tjetër nuk duhet të neglizhohet digjitalizimi. Me këtë dinamikë, digjitalizimi i teksteve shkollore do të realizohet për pesë vjet. Ne do të shohim përfitimet e ndryshimit të konceptit të ri të mësimdhënies dhe do të kemi përgjigje përfundimtare edhe për këtë pyetje. Ne do të përpiqemi të përmirësojmë procesin arsimor, ndryshe nga viti i kaluar, duke përfshirë të gjitha shkollat nga të gjitha komunat në procesin e digjitalizimit. Do ta rishikojmë procesin arsimor, do ta rishikojnë pjesën e digjitalizimit”, tha ministri Shaqiri.
Sa i përket formimit të një strategjie afatgjatë të arsimit që nuk do të ndryshojë sipas pikëpamjeve personale të secilit ministër të ri, Shaqiri sqaron se e tillë ekziston, por duhet menduar.
“Arsimi është një proces shumë i rëndësishëm. Që nga dita e parë që kam marrë detyrën kam diskutuar për formimin e një programi dhe strategjie afatgjatë për arsimin. Një strategji e tillë tashmë ekziston dhe i referohet periudhës 2018-2025, por e njëjta strategji duhet të merret në konsideratë. Do të përfshijmë ekspertë nga të gjitha anët, si nga pushteti ashtu edhe nga opozita, që të jetë gjithëpërfshirës dhe të ketë bazën ligjore që të jetë afatgjatë. Në periudhën e ardhshme do ta shikojmë nga pikëpamja juridike. Kjo do të thotë se pavarësisht nga ministri i Arsimit, strategjia do të jetë afatgjatë dhe të gjithë do të kenë detyrimin për ta zbatuar atë. Dua që koncepti i ri për arsimin fillor dhe reformat në arsimin e mesëm dhe të lartë të përshtaten në këtë strategji. Ky është një proces kompleks që fillimisht duhet të vendoset në një seancë tematike të Qeverisë, sqaron ministri i Arsimit.
Koncepti i ri i arsimit fillor 2021-2022 ka nisur me reforma për klasën e parë dhe të katërt, vitin e ardhshëm shkollor reformat do të jenë për klasën e dytë dhe të pestë.
LEXO: Për zhvillimin e digjitalizimit në arsimin e Maqedonisë së Veriut, ministria do të marrë mbështetje nga ekspertët estonez
LEXO: Ognenski nga Oda TIK e Maqedonisë: Digjitalizimi i arsimit duhet të bëhet në disa faza
