Talebanët fillojnë bisedimet me zyrtarët perëndimorë në Norvegji

Anëtarët e talebanëve takohen me zyrtarët perëndimorë në Norvegji për bisedimet e para në Evropë që kur grupi mori kontrollin e Afganistanit, shkruan BBC, transmeton Portalb.mk.

Bisedimet, të cilat do të zgjasin tre ditë, do të mbulojnë të drejtat e njeriut dhe krizën humanitare në vend.

OKB thotë se 95% e afganëve nuk kanë mjaftueshëm për të ngrënë.

Një numër protestash janë zhvilluar në Evropë me kritikët që pretendojnë se talebanët nuk duhet të shpërblehen me takime.

Të dielën, anëtarët e talebanëve u takuan me aktivistë të të drejtave të njeriut, por detajet e këtyre diskutimeve nuk janë zbuluar.

Aktivistja feministe, Jamila Afgani, i tha agjencisë së lajmeve AFP se negociatorët treguan “vullnet të mirë”.

“Të shohim se si do të jenë veprimet e tyre, bazuar në fjalët e tyre”, tha Afgani.

E hëna thuhet të jetë dita më e rëndësishme e bisedimeve, anëtarët talebanë takohen me zyrtarë perëndimorë. Grupi do të kërkojë akses në miliarda dollarë që janë të ngrira në bankat amerikane.

Afganistani ballafaqohet me rritje të papunësisë dhe çmimeve të ushqimeve, ndërkohë që vlera e monedhës së tij po bie dhe bankat kanë vendosur kufizime për tërheqjen e parave.

Kombet e Bashkuara kanë paralajmëruar se uria kërcënon 55% të popullsisë.

“Ne po kërkojmë që ata të shkrijnë asetet afgane dhe të mos ndëshkojnë afganët e zakonshëm për shkak të diskursit politik,” tha delegati i talebanëve Shafiullah Azam për agjencinë e lajmeve Associated Press.

“Për shkak të urisë, për shkak të dimrit vdekjeprurës, mendoj se është koha që komuniteti ndërkombëtar të mbështesë afganët, jo t’i ndëshkojë ata për shkak të mosmarrëveshjeve të tyre politike”, tha Azam.

Të dërguarit perëndimorë pritet të theksojnë rëndësinë e një qeverie më gjithëpërfshirëse talebane dhe të drejtave të njeriut.

Që nga marrja e pushtetit, talebanët u kanë thënë shumicës së punëtorëve vaiza-gra që të qëndrojnë në shtëpi ndërsa shkollat ​​e mesme janë të hapura vetëm për djemtë dhe mësuesit burra. Një numër grash janë shënjestruar pasi folën kundër kësaj lëvizjeje. Disa tani thuhet se janë të zhdukur. Por talebanët i thanë Quentin Sommervilles të BBC-së se akuzat ishin të sajuara.

Aktivistët e të drejtave të njeriut dhe gazetarët kanë qenë gjithashtu në shënjestër që kur talebanët erdhën në pushtet.

Të hënën, zëvendësministri i Afganistanit për Informacion dhe Kulturë, Zabihullah Mujahid, tha se vajzat do të lejohen të ndjekin shkollën nga fundi i marsit të këtij viti. Ai gjithashtu mohoi se talebanët po mbajnë një numër grash që kishin protestuar për të drejtat e tyre.

Aktualisht, asnjë vend nuk e ka njohur qeverinë e re afgane.

Ministrja e Jashtme e Norvegjisë, Anniken Huitfeldt tha se takimet “nuk përfaqësojnë një legjitimim apo njohje të talebanëve”.

“Por ne duhet të flasim me autoritetet de fakto në vend,” tha Huitfeldt.

Iniciativa ka ndarë afganët – disa theksojnë rëndësinë e angazhimit të talebanëve, të tjerë këmbëngulin se talebanët nuk duhet të ftohen në kryeqytetet evropiane, ndërkohë që ata shkelin sistematikisht të drejtat e njeriut në vendin e tyre, raporton Lyse Doucet e BBC-së.

Një sërë protestash janë zhvilluar në të gjithë Evropën gjatë fundjavës.

Në Oslo, një protestues i tha agjencisë së lajmeve AFP se diskutimet ishin ekuivalente me “tu qeshësh në fytyrë” afganëve që kanë humbur anëtarët e familjes.

“Ju nuk flisni me terroristët,” tha ajo.