fbpx

RMV, u votua qeveria e re, Dimitar Kovaçevski kryeministër

Kuvendi i dha mbështetje Qeverisë së propozuar nga Mandatari Dimitar Kovaçevski. Gjysmë ose para mesnate, 62 deputetë votuan pro Qeverisë së re, 46 kundër, ndërsa nuk kishte të përmbajtur .

***********************************************************************************************************************

Kryetari i Kuvendit, Talat Xhaferi, sonte ka dhënë gjysmë ore pauzë në seancën në të cilën po diskutohet për zgjedhjen e qeverisë së re dhe u ka bërë thirrje koordinatorëve që të koordinojnë pjesën përfundimtare të seancës, pas së cilës qeveria duhet të të votohet, transmeton Portalb.mk.

“Bëjmë një pauzë gjysmë ore dhe thërras koordinatorët e grupeve parlamentare të konsultohemi për raundin e fundit prej katër folësish, që të mbyllin ciklin e folësve dhe fjalëve mbyllëse të mandatit. Me këtë përmbyllim diskutimin dhe vazhdojmë seancën në ora 21 e 45”, tha Xhaferi.

Në pjesën e sotme të debatit, si dhe ditën e djeshme, deputetët e opozitës theksuan se qeveria e re do të vazhdojë vetëm pas ritmeve të pasuksesshme të asaj të mëparshme, që u pasuan me korrupsion, krim dhe skandale. Nuk ka legjitimitet dhe duhen zgjedhje të reja. Deputetët e qeverisë besojnë se qeverisja e kaluar i ka përballuar shumë mirë sfidat e deritanishme dhe nga e reja presin edhe më shumë punë në interes të qytetarëve dhe shtetit.

***********************************************************************************************************************

Në Kuvendin e Maqedonisë së Veriut të dielën, më 16 janar, ka vazhduar debati për zgjedhjen e qeverisë së re, që do të drejtohet nga Dimitar Kovaçevski, kryetar i Lidhjes Sociale Demokrate, transmeton REL.

Debati pritet të zgjasë deri në mesnatë kur edhe do të votohet për përbërjen e re të qeverisë.

Qeveria e re do të ketë 21 anëtarë; 17 ministra dhe 4 zëvendëskryeministra.

Lidhja Social Demokrate do të ketë 12 anëtarë të Qeverisë, gjashtë Bashkimi Demokratik për Integrim dhe tre partia Alternativa.

Të dielën debati ka nisur me fjalimet e deputetëve të VMRO DPMNE-së, të cilët thanë se qeveria që do të drejtohet nga Dmitar Kovaçevski nuk ka legjitimitet, pasi sipas deputetes së VMRO DPMNE-së, Bllagica Lasovska, “mandatari Kovaçevski nuk ka marrë pjesë në zgjedhje, nuk ka kërkuar besimin e qytetarëve dhe nuk ka marrë asnjë votë prej tyre andaj edhe nuk ka legjitimitet për të drejtuar qeverinë”.

Ajo tha se “shumica e ministrave janë vazhdimësi e regjimit hibrid” që u mund në zgjedhjet lokale disa muaj më parë”.

“Në kohën kur kemi krizë të rënë ekonomike, shëndetësore, energjetike dhe mungesë të ngrohjes qëndrore, mandatari për kryeministër flet për gjendje të mirë ekonomike dhe rritjen e Prodhimit Bruto Vendor. Si mund të harrojmë se kemi inflacion, se qytetarët nuk kanë as bukë për të ngrënë, kur çmimet e produkteve po rriten, kur paraja po humb vlerën?. Kjo është tallje me ndjenjat e qyetarëve”, deklaroi deputetja Lasovska.

Ndërkaq, Marija Georgievska, deputete e LSDM-së, tha se partitë që do të jenë pjesë e qeverisë së re kanë legjitimitet të plotë ta udhëheqin vendin, sepse në zgjedhjet e fundit parlamentare kanë marrë mbështetjen e qytetarëve.

“ Hristijan Mickoski në zgjedhjet parlamentare nuk ishte bartës i listës dhe kandidat për deputet, pra a do të kishte legjitimitet për të formuar qeveri nëse do të fitonte VMRO-DPMNE dhe koalicioni i tij?” tha Georgievska duke hedhur poshtë pretendimet e opozitës se qeveria nuk ka legjitimitet.

Halil Snopçe, deputet i Aleancës për Shqiptarët tha se “qeveria mund të quhet e re, por të gjithë anëtarët e saj janë fytyra të vjetra të qeverisë së kaluar të korruptuar dhe të paaftë të përballet me shumë probleme me të cilat përballet vendi”.

Ai tha se zgjedhjet e parakohshme parlamentare janë mënyra e vetme për dalje nga gjendja në të cilën ndodhet Maqedonia e Veriut.

Dimitar Apasiev, deputet i partisë “E Majta”, kritikoi përbërjen e qeverisë, respektivisht numrin e madh të ministrave shqiptarë, që sipas tij, flet për tendencën për “shqiptarizimin e Maqedonisë”.

“11 poste ministrore për maqedonasit dhe 10 për shqiptarët. Pra, kjo është një tirani kornizë, një gjysmë protektorat, një shtet paralel në një shtet ku të rinjtë maqedonas dhe shqiptarë nuk komunikojnë, mosrespektimi i himnit, gjuhës, kurse Bujar Osmani (Ministri i Punëve të Jashtme) duhet të ketë kujdes se çfarë bën me Bullgarinë”, deklaroi Apasiev.

Ndryshe, mandatari për formimin e qeverisë së re, Dimitar Kovaçevski në fjalimin e tij para deputetëve tha se ka plan konkrete për zhvillimin e vendit dhe se puna e Qeverisë së re do të përqendrohet në tri prioritete: përballjen me krizën energjetike, pandeminë e koronavirusit, rritjen e standardit jetësor të qytetarëve të Maqedonisë së Veriut dhe realizimin e investimeve strategjike.

Ai tha se qeveria do të angazhohet seriozisht edhe për zgjidhjen e kontestit me Bullgarinë, por përjashtoi çdo mundësi që të bisedohet edhe për çështjet që kanë të bëjnë me identitetin. Kovaçevski hodhi poshtë edhe kërkesën e opozitës për zgjedhje të parakohshme.

Ai në postin e kreut të Qeverisë së Maqedonisë së Veriut do të zëvendësojë ish-kryeministrin Zoran Zaev, i cili dha dorëheqjen për shkak të disfatës së LSDM-së në zgjedhjet lokale, që u mbajtën më 31 tetor të vitit 2021.

***********************************************************************************************************************

Në Kuvend sot është caktuar të vazhdojë debati për zgjedhjen e qeverisë së re të RMV-së, i cili do të fillojë në orën 12, njofton Portalb.

Debati kuvendor për zgjedhjen e qeverisë së re zgjat më së shumti dy ditë, ndërsa për zgjedhjen e përbërjes së re qeveritare votohet pas përfundimit të saj, gjegjësisht më së voni deri në orën 24 ditën e dytë ose në këtë rast të dielën deri në mesnatë. Qeveria do të zgjidhet nëse për të votojnë shumica nga numri i përgjithshëm i deputetëve në Kuvend.

Lajme të ngjashme

Leave a Reply

Your email address will not be published. Required fields are marked *

Back to top button