“Royal Travel” pa licencë transportonte udhëtarët, e lidhur me “Besa Trans Shkup”
Inspektorati i Qytetit të Shkupit ka shqiptuar gjobë dhe ka ngritur padi kundër kompanisë “Royal Travel DOOEL Skopje” për transportimin e udhëtarëve pa licencë, shkruan Alsat, transmeton Portalb.mk.
Nga Qyteti i Shkupit informojnë se është kryer kontroll në tre autobusë dhe dy furgonë, dhe është konstatuar se një furgon i “Royal Travel DOOEL” ka bërë transportin e udhëtarëve për dhe nga Shkupi si dhe ekskursione, pa pasur licencë për agjenci turistike dhe transport për pasagjerë, si dhe për organizimin e ekskursioneve me guidë turistike, nga Ministria e Ekonomisë, e cila është e detyrueshme në përputhje me ligjin për turizmin, dhe nuk ka leje nga Ministria e Transportit dhe Post-Telekomunikacionit.
Ata theksojnë se kompania “Royal Travel DOOEL” në të cilën është regjistruar furgoni është themeluar më 28 dhjetor 2021 dhe sipas informacioneve të publikuara këto ditë në media bëhet fjalë për persona dhe automjete të lidhura me “Besa Trans”.
Kompanisë “Besa Trans” i është hequr licenca për transportin e udhëtarëve, pasi paraprakisht ishin konstatuar parregullsi në funksionimin e saj.
Kujtojmë se pardje pronarët e agjencisë Royal Travel hodhën poshtë pretendimet se kanë lidhje me agjencinë Besa Trans dhe pronarin Bekim Haxhiu.
- LEXO: Ministria e Ekonomisë sot i ka marrë licencën Agjencisë turistike “Besa Trans”
- LEXO: “Royal Travel”: Nuk kemi asnjë lidhje me “Besa Transin”
- LEXO: “Besa Trans Preshevë” pas lajmeve në media u zhduk nga “Facebook” (Video)
- LEXO: Pronari i “Besa Trans”, Bekim Haxhiu: Nuk kam lidhje me “Besa Trans Preshevë”
- LEXO: “Besa Trans” nga Presheva organizon udhëtime për në Stamboll edhe për qytetarët e RMV-së
Përndryshe, në aksidentin tragjik të autostradës “Struma” në Bullgari që ndodhi më 23 nëntor ndërruan jetë 45 persona, prej të cilëve 12 fëmijë, ndërsa shtatë u lënduan. Ata po ktheheshin nga udhëtimi turistik në Turqi.
