18 janari u rivendos si datë e vizitës së kryeministrit bullgar në Maqedoninë e Veriut
Ministria për Punë të Jashtme në Maqedoninë e Veriut ka bërë të ditur që përsëri është vendosur që 18 janari të jetë dita kur kryeministri i ri i Bullgarisë do të vizitojë Maqedoninë e Veriut, transmeton Portalb.mk.
“Informojmë se termini: 18 janar, e martë, mbetet si datë e caktuar për realizimin e vizitës, e cila pritet të korrespondojë edhe me zgjedhjen e Qeverisë së re në vend.”, njoftojnë nga Ministria për Punë të Jashtme në Maqedoninë e Veriut.
Ministria sqaroi që ky vendim erdhi pas konsultimeve ndërmjet dy MPJ-së në Maqedoninë e Veriut dhe në Bullgari, duke sqaruar që vendimi për vetëizolimin e një pjesë te kabinetit të kryeministrit Petkov, nuk do të ndikojnë në vizitën e tij në Shkup.
Ndryshe, vizita e paralajmëruar e kryeministrit bullgar Kiril Petkov në Shkup gjatë ditës u vlerësua se do të anulohet për kohë të pacaktuar, pasi që ai përfundoi në vetëizolim për shkak të kontaktit me person pozitiv në COVID-19, në mbledhjen e Këshillit Konsultativ për Siguri Nacionale në Sofje. Nga Qeveria bullgare informuan se vizita në Shkup nuk anulohet, por shtyhet për kohë të pacaktuar.
Kujtojmë se, Maqedonia e Veriut dhe Bullgaria tensionuan raportet për shkak të kontesteve historike. Sofja zyrtare kërkon që Shkupi t’i pranojë kërkesat bullgare se gjuha maqedonase është normë e asaj bullgare dhe se kombi maqedonas është krijuar nga Tito.
Ky kontest ka bllokuar procesin eurointegrues të vendit, me çka Bullgaria këtë vit i vendosi dy herë veto Maqedonisë së Veriut, njëherë në qershor, kurse më pas, më 14 dhjetor, edhe një herë e bllokoi fillimin e negociatave RMV-BE.
Edhe në vitin 2020, njëjtë vendi fqinj, i vendosi dy here veto Maqedonisë së Veriut, një herë në këshillin e ministave të Jashtëm të BE-së si dhe në Këshillin për Punë të Përgjithshme të BE-së, duke penguar në këtë mënyrë miratimin e kornizës negociuese për fillimin e negociatave të vendit me BE-në. Për zgjidhjen e kontesteve të historisë, komisioni maqedono – bullgar ka mbajtur takime, po nuk kanë arritur të gjejnë zgjidhje. Palët kanë mosmarrëveshje më së shumti rreth identitetit të figurave historike të Mbretit Samoil dhe Goce Delçevit.
