India ndaloi fondet e huaja për organizatën bamirëse të Nënë Terezës
Qeveria e Indisë ndaloi organizatën bamirëse të Nënë Terezës për të marrë fonde nga jashtë, duke thënë se nuk plotësonte kushtet sipas ligjeve lokale, raporton VOA.
Në njoftimin e saj Ministria e Brendshme thotë se gjatë shqyrtimit të dokumentacionit për rinovimin e licencës së organizatës “Misionaret e Bamirësisë”, gjeti “informacione të pafavorshme”, por pa dhënë hollësi të tjera.
Njoftimi vjen ndërsa në Indi janë shtuar sulmet ndaj të krishterëve nga grupe Hindu të ekstremit të djathtë, të cilët i akuzojnë priftërinjtë dhe kishat se detyrojnë banorët të konvertohen në katolikë.
Në fillim të dhjetorit, organizata “Misionaret e Bamirësisë”, që Nënë Tereza themeloi në vitin 1950, u vu nën hetime pas disa ankesave se vajzat në strehimoret e saj ishin detyruar të lexonin Biblën dhe të recitonin lutje të krishtera. Organizata i mohon akuzat.
“Misionaret e Bamirësisë”, operon qindra strehimore që kujdesen për disa prej më të varfërve, që Nënë Tereza i quante “më të varfërit e të varfërve”.
India ka komunitetin më të madh katolik në Azi pas Filipineve. 18 milionë katolikët e Indisë përbëjnë gjithsesi një pakicë të vogël krahasuar me popullsinë kryesisht Hindu prej 1.4 miliardë banorësh të Indisë.
Kritikët thonë se tensionet fetare janë shtuar nën qeverinë nacionaliste Hindu të Kryeministrit Narendra Modi.
Nënë Tereza u nderua me çmimin Nobel të Paqes në vitin 1974 dhe Papa Françesku e shpalli atë shenjtore në vitin 2017, dy dekada pas vdekjes.
