Osmani për deklaratat e Vullinit: E pamundur të ndryshohen faktet historike

Ministri i Brendshëm serb, Alleksandar Vullin reagoi sot ndaj kritikave të Bashkimit Evropian dhe SHBA-së lidhur me deklaratat e tij për masakrën e Reçakut në Kosovë. Vullin tha se “asgjë nuk mund të bëhet që e vërteta për Reçakun të mos bëhet e dukshme dhe e dëshmuar”. Ndërsa presidentja e Kosovës, Vjosa Osmani, deklaroi se mohimi nëpërmjet rehabilitimit të kriminelëve të luftës është krim i përsëritur, transmeton REL.

Bashkimi Evropian dhe SHBA-ja më 10 dhjetor dënuan mohimin e masakrës ndaj popullatës civile shqiptare në Reçak në vitin 1999, duke thënë se ky krim është ‘i dëshmuar’.

Forcat policore e ushtarake serbë në Kosovë, vranë më 15 janar 1999, 45 civilë shqiptarë, në mesin e të cilëve kishte gra e fëmijë.

Kjo masakër paraqiti momentin kryesor në vendimin e NATO-s që të nisë intervenimin ajror ushtarak ndaj asokohe, Republikës Federale Serbe (SRJ), për shkak të luftës dhe shkeljes së të drejtave të njeriut në Kosovë.

Bashkimi Evropian dhe SHBA-ja reaguan ndaj deklaratave të ministrit të Brendshëm serb, Vullin i cili përshkroi më 10 dhjetor masakrën në Reçak si ‘gënjeshtër të madhe dhe fabrikim të jashtëzakonshëm”.

“Të mëdhenjtë po zemërohen me serbët të cilët nuk frikësohen të thonë të vërtetën, sidomos të vërtetën e cila tregon se sa të mëdhenjtë ishin të vegjël para popullit tonë. Filmat nga Kosharja, Pashtriku, Reçaku i xhiruam që zemërimi i fuqive të mëdha dhe frika e disa serbëve të mos e vrasin të vërtetën”, tha Vullin shkruan në njoftimin e Ministrisë së Brendshme serbe më 11 dhjetor.

Vullin përmendi që është krenar, siç tha, që “është pjesë e luftës për të vërtetën”.

“Jam i gatshëm që për këtë të paguaj çmimin edhe politik edhe personal. Koka ime është çmim i vogël për të drejtën e serbëve që për shkak të gënjeshtrave të të tjerëve të mos turpërohen para fëmijëve të vet”, tha b.

Sipas tij asgjë s’mund të bëhet që e vërteta për Reçakun të mos bëhet e dukshme dhe e dëshmuar.

“Kur kryeministri i Kosovës, Albin Kurti flet për krijimin e Shqipërisë së Madhe, Bashkimi Evropian dhe SHBA-ja heshtin. Kur gjykatat lirojnë kriminelët e dëshmuar të luftës, Oriqin, (ish-komandantin e Bosnje e Hercegovinës, Naser Oriq), Gotovinën (gjenerali kroat, Ante Gotovina), Ramush Haradinajn (ish-kryeministër i Kosovës), Bashkimin Evropian dhe SHBA-ja heshtin, e kur Prishtina refuzon të zbatojë Marrëveshjen e Brukselit, Bashkimi Evropian dhe SHBA-ja heshtin. Kur unë e them të vërtetën për Reçakun, Bashkimi Evropian dhe SHBA-ja deklarohen”, vlerësoi Vullin.

Kjo nuk është hera e parë që Vullin e mohon masakrën e Reçakut. Autoritetet në Serbi, që udhëhiqen nga presidenti Aleksandar Vuçiq, këtë masakër e kanë cilësuar si “krim të fabrikuar”.

Ministria e Punëve të Brendshme e Serbisë dhe Radio Televizioni i Serbisë, së fundmi janë duke bashkëprodhuar një serial me gjashtë episode, të quajtur “Dosja e Kosovës”, i cili, siç është paralajmëruar, trajton “kronologjinë e ngjarjeve dhe fatin e civilëve dhe policisë në Kosovë” nga viti 1998 deri më 2001.

Presidentja e Kosovës, Vjosa Osmani tha se Vullini me propagandë po përpiqet t’i ndryshojë faktet historike.

Pas një vizite në një lokacion afër Nishit, ku po bëhen xhirime të një seriali për ngjarjet në fshatin Reçak, Vullin tha se “pretendimi për masakrën është fyerje e madhe për mbarë njerëzimin”.

“Ish-zëdhënësi i gruas së kriminelit Millosheviq, me propagandë po përpiqet t`i ndryshojë faktet historike. E pamundshme dhe e paarritshme. Në Reçak ka ndodhur krim kundër njerëzimit. Ky fakt është i njohur dhe i dokumentuar botërisht. Tendencat e Vullinit shpërfaqin ambicien e Serbisë për ndryshimin e historisë, kjo përpjekje e kamotshme e këtij shteti në relacion me Kosovën”, citohet Osmani në një njoftim të publikuar nga Presidenca.

Sipas Osmanit, e vërteta për Reçakun është me e fuqishme se çfarëdo propagande e Vullinit dhe bashkëmendimtarëve të tij.

“Ata mund të bëjnë filma, por në Reçak e anekënd Kosovës ka ndodhur një realitet që ka shpërfaqur qëllimin e shtetit serb për shfarosjen e popullit shqiptar në Kosovë”, tha tutje Osmani.

Deklaratat e Vullinit i kanë dënuar edhe SHBA-ja dhe Bashkimi Evropian. Në reagimin e tyre thuhet se mizoritë në Reçak janë të dokumentuara.

Forcat policore e ushtarake serbë në Kosovë, vranë më 15 janar 1999, 45 civilë shqiptarë, në mesin e të cilëve kishte gra e fëmijë.

Kjo masakër paraqiti momentin kryesor në vendimin e NATO-s që të nisë intervenimin ajror ushtarak ndaj asokohe, Republikës Federale Serbe (SRJ), për shkak të luftës dhe shkeljes së të drejtave të njeriut në Kosovë.

Lajme të ngjashme

Leave a Reply

Your email address will not be published. Required fields are marked *

Back to top button