fbpx

Shqipëri: votohet për shkarkimin e Bashës në kuvendin e Berishës

Në Shqipëri, Kuvendi i thirrur sot nga ish kryeministri Sali Berisha dhe mbështetësit e tij, ka nisur një votim të fshehtë për shkarkimin e kryetarit të PD-së Lulzim Basha “për thyerje të rënda të statutit të PD, përvetësim të kompetencave të organeve qendrore dhe dëm të rëndë të interesave politike dhe elektorale të saj”, transmeton VOA.

Vendimi u mor pasi më herët u votua një statut i ri i PD-së, në bazë të të cilit u shpallën të pavlefshme dhe të gjitha strukturat drejtuese aktuale si dhe vendimet e marra prej tyre së fundmi, përfshirë thirrjen e një Kuvendi më 18 Dhjetor. Pikërisht në këtë datë sipas vendimit të sotëm, anëtarët e partisë do të duhet të shprehen me referendum për rezultatin e votimit për shkarkimin e Bashës.

Një Komision për Rithemelimin e PD-së i përbërë nga 29 anëtarë, përfshirë Berishën, do të jetë institucioni Kolegjial që do të drejtojë partinë deri në Kuvendin e ardhshëm më 22 Mars 2022, ku do të zgjidhen strukturat e reja drejtuese.

Statuti i ri, u miratua pa ju nënshtruar asnjë lloj debati. Në të parashikohen ndërhyrje të thella që nga parimi 1 anëtar 1 votë edhe për zgjedhjen e organeve në qendër dhe ato lokale, te organizimi i primareve për përzgjedhjen e kandidatëve si për deputetë ashtu dhe për nivelet lokale, te referendumet, lejimi i fraksioneve, riformatimi i strukturave drejtuese e sansksionimi i largimit të kryetarit të partisë nga posti në rast të humbjes së zgjedhjeve.

Data e zgjedhur për Kuvendin e sotëm, përban një simbolikë të fortë, sepse përkon me ditën e themelimit të Partisë Demokratike. Dhe ky Kuvend është cilësuar si akti i “rithemelimit” të kësaj force politike, dhe “rikthimin e saj në një focë të vërtetë opozitare të sigurtë që do udhëheqë revolucionin demokratik paqësor të shqiptarëve”.

Vendimi i Departamentit amerikan të Shtetit, në muajin maj, për të përcaktuar Berishën në listën e zyrtarëve të përfshirë “në korrupsion në nivel të lartë”, e për pasojë duke mos lejuar më hyrjen e tij dhe familjes së tij në territorin e Shteteve të Bashkuara ishte një goditje e fortë për PD-në, e sapo dalë e humbur nga zgjedhjet e radhës së 25 Prillit.

Por tronditja e madhe erdhi pak muaj më pas, kur në fillim të shtatorit kryetari i PD-së Lulzim Basha njoftoi vendimin për ta lënë Berishën jashtë grupit parlamentar. Një akt të cilin ish kryeministri nuk e gëlltiti për asnjë moment, e që pasoi me një lëvizje të fortë të tij brenda radhëve të demokratëve. Kryetari Lulzim Basha, njeriu të cilin ai e kishte përkrahur gjatë gjithë këtyre viteve, pavarësisht, humbjeve radhazi në disa zgjedhje, u kthye menjëhere në shënjestrën e sulmeve të Berishës në turin që ai ndërmori nëpër qytete të ndryshme në mbarë Shqipërinë.

Edhe sot Berisha lëshoi akzua të ashpra ndaj Basha, i cili sipas tij e ka çuar partinë përpara një sfide ekzistenciale, se i është përkulur Edi Ramës dhe se ka lënë në mes të gjitha nismat e rëndësishme të ndërmarra, dhe se pas zgjedhjeve të 25 prillit u kujdes më shumë për karriken e tij.

“Pasi tradhtoi votën tuaj e të 620 mijë shqiptarëve vijoi në rrugën e tij duke kryer krimin më të shëmtuar që mund të kryejë një udhëheqës, shkelmimin e sovranitetit, për të shpëtuar kokën e tij, sepse si burracak, nuk kishte karakter të jepte dorëheqjen”, deklaroi Berisha duke ju referuar vendimit të kryetarit demokrat për përjashtimin e tij nga grupi parlamentar.

Berisha e ka kundërshtuar si “të pabazuar në fakte dhe prova” vendimin e Departamentit amerikan të Shtetit, duke ushqyer te mbështetësit e tij idenë e një akti politik të marrë nën ndikime njerëzve të caktuar. Ai sot foli për “një ndërhyrje të pashembullt, brutale të diplomatëve dhe zyrtarëve nga një vend mik, SHBA”, ndërsa sulmoi dhe ambasadaoren amerikane në Tiranë Yuri Kim. “Eshtë e trishtuar, e dhimbshme, të shohësh ambasadoren e SHBA të sillet si guvernatore, si ambasadori sovjetik në Tiranë dikur”, tha ai duke folur për standarte të dyfishta që çuan në ndëshkimin e tij.

Por në intervistën e dhënë për gazetarin Sokol Balla në “Neës 24”, zëvendës Ndihmës Sekretari i Shtetit i SHBA për Çështjet Europiane dhe Euroaziatike dhe i Dërguari i Posaçëm për Ballkanin Perëndimor Gabriel Escobar saktësoi se vendimi përfaqëson “përpjekje institucionale për të luftuar korrupsionin. Ja se ç’janë. Ndaj, nuk u bë nga një administratë, nuk u bë nga një vendim-marrës, dhe nuk u bë nga një anëtar apo një organizatë brenda kabinetit. Ishte një përpjekje kolektive dhe arritëm konsensus për të”.

Për më tepër, zyrtari i lartë i Departamentit të Shtetit, Escobar bëri të qartë se “nuk takohemi me të. Është i shpallur. Pra, do të ketë pasoja nëse Partia Demokratike zgjedh dikë që është i shpallur për të qenë udhëheqësi i saj”.  tha gjithashtu se “do të nxisja njerëzit të mendojnë me shumë kujdes se cilët udhëheqës zgjedhin, se në cilën rrugë duan të jetë Shqipëria. Dhe shpresojmë se përgjigja do të jetë një rrugë me fokusin europian, përkushtuar ndaj NATO-s, dhe përkushtuar ndaj luftës kundër korrupsionit”.

Berisha megjithatë deklaroi sot se “ftoj zyrtarët e Departamentit të rishqyrtojnë vendimin sepse arroganca dhe gabimi nuk janë virtute të njerëzve të lirë”.

Kuvendi i sotëm, nuk njihet nga drejtuesit aktualë të Partisë Demokratike. Sipas tyre, lëvizja e ndërmarrë nga ish kryeministri “nuk ka asnjë lidhje me demokratët dhe hallet e tyre, por me hallin personal të BerishësBasha ka thirrur për të shtunën e ardhshme më 18 Dhjetor, atë që e cilëson “Kuvendin legjitim” të Partisë Demokratike. Mbrëmë, nga selia e PD u lexuan 5200 emra të delegatëve të Kuvendit kombëtar, të cilët kishin konfirmuar zyrtarisht pjesmarrjen.

Lajme të ngjashme

Leave a Reply

Your email address will not be published. Required fields are marked *

Back to top button