Studimet tregojnë që mikroplastikat që ushqime shkaktojnë dëme në qelizat njerëzore, kjo është shqetësuese

Një studim së fundmi zbuloi që në ushqimet të cilat ne konsumojmë gjenden mikroplastika që shkaktojnë dëme në qelizat njerëzore. Dëmi përfshin vdekjen e qelizave dhe reaksionet alergjike dhe hulumtimi është i pari që tregon se kjo ndodh pasi që njerëzit konsumojnë ushqime me mikroplastikë. Megjithatë, ndikimi i tyre në trupin e njeriut ende nuk dihet, sepse nuk dihet se sa kohë mikroplastika qëndrojnë në trup përpara se të ekskretohen, shkruan The Guardian, transmeton Portalb.

Ndotja me mikroplastikë ka kontaminuar të gjithë planetin, nga maja e malit Everest deri te oqeanet më të thella. Njerëzit tashmë konsumojnë grimca të vogla nëpërmjet ushqimit dhe ujit, si dhe duke i thithur ato.

Hulumtimi analizoi 17 studime të mëparshme të cilat shikonin ndikimet toksikologjike të mikroplastikës në linjat qelizore njerëzore. Shkencëtarët krahasuan nivelin e mikroplastikës në të cilën ishte shkaktuar dëmtim në qeliza me nivelet e konsumuara nga njerëzit përmes ujit të pijshëm të kontaminuar, ushqimeve të detit dhe kripës së tryezës.

Ata gjetën lloje të veçanta të dëmtimit si vdekja e qelizave, reagimi alergjik dhe dëmtimi i mureve qelizore të cilat shkaktoheshin nga nivelet e mikroplastikës që njerëzit hanë.

“Efektet e dëmshme në qeliza janë në shumë raste ngjarja fillestare për efektet shëndetësore. Duhet të shqetësohemi. Tani për tani, nuk ka vërtet një mënyrë për të mbrojtur veten.”  tha Evangelos Danopoulos, nga Hull York Medical School.

Hulumtimet e ardhshme mund të bëjnë të mundur identifikimin e ushqimeve më të kontaminuara dhe shmangien e tyre, tha ai, por zgjidhja përfundimtare ishte ndalimi i humbjes së mbetjeve plastike.

Hulumtimi mbi ndikimin shëndetësor të mikroplastikës po rritet me shpejtësi, tha Danopoulos: “Po shpërthen dhe për arsye të mirë. Ne jemi të ekspozuar ndaj këtyre grimcave çdo ditë: po i hamë, po i thithim. Dhe ne nuk e dimë me të vërtetë se si reagojnë në trupat tanë.”

Hulumtimi tregoi gjithashtu se mikroplastika me formë të parregullt shkaktojnë më shumë vdekje qelizore sesa ato sferike. Kjo është e rëndësishme për studimet e ardhshme pasi shumë mikroplastika të blera për t’u përdorur në eksperimentet laboratorike janë sferike dhe për këtë arsye mund të mos jenë përfaqësuese të grimcave që njerëzit hanë.

“Kjo punë ndihmon në informimin se ku duhet të kërkojnë për të gjetur efekte të botës reale. Ishte interesante që forma ishte kaq e rëndësishme për toksicitetin, pasi konfirmon atë që shumë studiues të ndotjes plastike besonin se do të ndodhte që sferat e pacenuara të përdorura në eksperimentet laboratorike mund të mos tregojnë efektet e botës reale.” tha studiuesi i mikroplastikës Steve Allen.

Danopoulos tha se hapi tjetër për studiuesit ishte të shikonin studimet e dëmtimit të mikroplastikës në kafshët laboratorike, eksperimentet mbi subjektet njerëzore nuk do të ishin etike. Në mars, një studim tregoi se grimcat e vogla plastike në mushkëritë e minjve shtatzënë kalojnë me shpejtësi në zemrat, trurin dhe organet e tjera të fetusit të tyre.

Në dhjetor, mikroplastika u zbulua në placentën e foshnjave të palindura, për të cilën studiuesit thanë se ishte “një çështje shqetësuese”. Në tetor, shkencëtarët treguan se foshnjat e ushqyera me qumësht formule në shishe plastike po gëlltitnin miliona grimca në ditë.