Prokuroria ka hapur lëndë për Nedellkovskin për gjuhën e urrejtjes për aksidentin e autobusit në Bullgari
Prokuroria Themelore Publike e Shkupit njofton se ka formuar lëndë për gazetarin kontrovers Milenko Nedellkovskin në lidhje me statustin e tij në Facebook me përmbajtje të gjuhës së urrejtjes për aksidentin e autobusit të RMV-së në Bullgari, ku humbën jetën 45 persona dhe 7 të tjerë janë lënduar. Lënda u formua në Prokurori pasi që gazetari i Portalb.mk, dorëzoi paraqitje në Ministrinë e Punëve të Brendshme dhe Prokurori për rastin në fjalë.
“Kundër personit të cilin e theksoni është formuar lëndë pas pranimit të njoftimit nga Ministria e Punëve të Brendshme. Sipas udhëzimeve të prokurorit, po veprohet që të shqyrtohen elemente eventuale të veprës penale në lidhje me publikimin në fjalë”, thonë nga Prokuroria.
Ministria e Punëve të Brendshme njofton se po i pret udhëzimet e Prokurorisë.
“Në lidhje me paraqitjen e dorëzuar nga gazetari Suad Bajrami nga internet portali www.portalb.mk, për aksidentin e autobusit i cili ka ndodhur në Republikën e Bullgarisë, ku i njëjti paraqet se nga ana profili i Fejsbukut me emrin “Milenko Nedelkovski” është publikuar një publikim me titull “A JANË MALLKIMET SHKAKU”, Ju njoftojmë se nga ana e Sektorit për Krim Kompjuterik dhe Forenzikë Digjitale është dorëzuar Njoftim deri te Prokuroria Themelore Publike Shkup me qëllim të marrjes së udhëzimeve për veprimin tonë të mëtutjeshëm. Ju njoftojnë se nga ana e Prokurorisë Themelore Publike Shkup deri në datën e sotme ende nuk na janë dorëzuar udhëzime për veprimin tonë të mëtutjeshëm”, thonë nga MPB.
Ndryshe, një ditë pas aksidentit tragjik të autobusit në Bullgari, i cili ndodhi më 23 nëntor dhe në të cilin humbën jetën 45 persona, shumica prej të cilëve fëmijë dhe të rinj, Nedellkovski në rrjetin social Facebook publikoi një status me përmbajtje të gjuhës së urrejtjes.
Gjegjësisht, derisa opinioni ishte i tronditur për ngjarjen tragjike të djegies së autobusit në autostradën bullgare Struma dhe derisa të gjithë pyesnin për shkakun apo shkaqet e aksidentit, Nedellkovski shkruajti “A janë mallkimet shkaku?”, duke lënë të kuptohet që sipas tij aksidenti ka ndodhur si shkak mallkimeve ndaj shqiptarëve.
Po aq skandaloze janë edhe komentet e qytetarëve nën postimin e tij.
“Nuk e di Milenko, por arrijnë kurdoherë. Kështu ka qenë nga kohërat e lashta”, shkruan një qytetar i cili në profilin e Facebookut e ka emrin Mihajllo Naumoski Makedonski, komentin e të cilin e kanë pëlqyer 10 persona.
“Zoti është i madh, mund të vonojë, por nuk harron”, shkruan qytetari me emrin Spirko Blazevski.
“Mban ujë!”, shkruan një qytetar me emrin Vladimir Spirov.
“Hmmm, si Zoti askush!”, shkruan Petko Nedelkovski.
Këto janë vetëm disa prej komenteve, ndërkaq ka edhe një sërë reagimesh të cilët janë të revoltuar me këtë status.
Sipas Kodit Penal, për vepër penale përhapje të informacioneve raciste dhe ksenofobisë në internet parashihet dënim me burg prej 1 deri në 5 vjet. Portalb.mk ndër vite shkruan për problematikën e gjuhës së urrejtjes dhe të gjitha pasojat që kjo e fundit i sjellë shoqërisë multietnike të Maqedonisë së Veriut. Është shumë e rëndësishme të ndërmerren masa në mënyrë që kjo dukuri të minimizohet dhe këto vepra penale të mos jenë kaq të theksuara në vend.
Në RMV nuk ndëshkohen personat që shpërndajnë gjuhë të urrejtjes
Në një uebinar “Si ta luftojmë gjuhën e urrejtjes?” i cili u mbajt në qershor, panelistët deklaruan se Prokuroria vazhdon të mos i procesuojë rastet e gjuhës së urrejtjes dhe rrjedhimisht me këtë në Maqedoninë e Veriut vazhdon të mos ndëshkohet gjuha e urrejtjes, pavarësisht se është vepër penale.
Nuk është hera e parë që Nedellkovski shpërndanë gjuhë të urrejtjes. Ai disa herë ka shpërndarë statuse skandaloze nëpër rrjetet sociale, për të cilat janë dorëzuar edhe padi penale. Megjithatë, i njëjti nuk është ndëshkuar.
Se nuk ndëshkohet gjuha e urrejtjes dëshmon edhe rasti në lidhje me aksidentin e autobusit të “Durmo” Tursit në vitin 2019-të. Në ditën e aksidentit në Llaskarcë ku humbën jetën 16 persona, profesoresha Biljana Vankovska nëpërmjet rrjetit social Fejsbuk shpërndau një status “Çfarë tragjedie dhe ironie: Karpallëk”, i cili u cilësua gjuhë e urrejtjes pasi aksidentin e ka lidhur me ndodhinë e konfliktit të vitit 2001 në Karpallëk në të cilën u vranë 10 ushtarë të Armatës së Maqedonisë nga formacionet e Ushtrisë Çlirimtare Kombëtare. Megjithatë, prokurori kompetent i Prokurorisë së Shkupit, e hodhi poshtë padinë penale të Ministrisë së Punëve të Brendshme.
Për dallim prej organeve tona, autoritetet bullgare kanë arrestuar një burrë nga Sofja, menjëherë pasi ai në Facebook ka publikuar komente, jashtë normave morale dhe etike, në lidhje me aksidentin tragjik të autobusit në Bullgari. Materialet janë denoncuar në Prokurorinë e qarkut në Sofje për veprën penale në bazë të nenit 462 të Kodit Penal – shpërndarje të urrejtjes në baza nacionaliste nëpërmjet sistemit elektronik.
- LEXO: Rastet e gjuhës së urrejtjes në RMV, “ngufaten” në Prokurori (VIDEO)
- LEXO: KH: 86% e incidenteve nga gjuha e urrejtjes në RMV, janë bërë për shkaqe etnike (Infografik)
- LEXO: Fondacioni Metamorfozis dhe KriThink: I dënojmë sulmet diskriminuese ndaj gazetares Mirosllava Burns
- LEXO: Maqedonia e Veriut: Rritje e gjuhës së urrejtjes në rrjete sociale
- LEXO: Mashtrime, gënjeshtra dhe urrejtje, “Infeksioni” tjetër prej koronavirusit
- LEXO: Absurde! Aktakuzë për kundërvajtje kundër shkupjanes për shkak se ka fshirë grafitë me gjuhë të urrejtjes (FOTO)
- LEXO: Ekspertët e Këshillit Evropian: gjuha e urrejtjes dhe ksenofobia janë bërë problem i përgjithshëm në Evropë
- LEXO: Gjuha e urrejtjes, reflektim i nacionalizmit maqedonas ndaj shqiptarëve
- LEXO: Maqedonia “vlon” nga gjuha e urrejtjes, por rastet rrallë procesuohen në Gjykatë (Infografik)
