Greqia dhe Zvicra vendosin masa të reja për udhëtarët

Greqia dhe Zvicra kanë vendosur masa të reja anti-COVID sa u përket udhëtimeve në ato vende, raporton EN. Risia për Greqinë është që ndalon hyrjen e qytetarëve nga vendet e treta, ndërsa Zvicra e bën të detyrueshme që edhe personat e vaksinuar të paraqesin një test COVID, para udhëtimit si edhe gjatë qëndrimit në vend.

Shtetasit e vendeve të treta e kanë përkohësisht të ndaluar të hyjnë në Greqi, nga çdo pikë hyrjeje, duke përfshirë lidhjet ajrore, detare, hekurudhore dhe rrugore. Njoftimin e bëri Ministria e Jashtme në Shqipëri, ndërsa theksoi se ky ndalim nuk vlen për banorët e përhershëm të Shqipërisë.

Kjo masë e re e vendosur nga Greqia vjen për të parandaluar përhapjen e COVID-19.

Të gjithë udhëtarët drejt Greqisë, pavarësisht kombësisë dhe mënyrës së hyrjes, duhet:

1- Të plotësojnë formularin elektronik PLF, në adresën elektronike https://travel.gov.gr, përpara mbërritjes në Greqi.

2- Të kenë kaluar të paktën 14 ditë nga vaksinimi për COVID-19 dhe të paraqesin një certifikatë vaksinimi. Certifikata e vaksinimit duhet të përfshijë emrin e personit, llojin e vaksinës së administruar, numrin e dozave dhe datën në të cilën ato janë dhënë.

3- Një tjetër mundësi është paraqitja e testit negativ laboratorik PCR për COVID-19 brenda 72 orëve para mbërritjes, ose në një test të shpejtë (rapid test) brenda 48 orëve para mbërritjes.

“Të gjithë udhëtarët drejt Greqisë, pavarësisht kombësisë dhe mënyrës së hyrjes, do t’u lejohet hyrja në vend, në qoftë se diagnostikohen negativë me një test të detyrueshëm laboratorik PCR ose rapid test, në pikat e hyrjes së Greqisë”, njoftoi ministria e Jashtme.

Pikat kufitare e Kakavisë, Kapshticës dhe Qafbotës funksionojnë 24 orë. Pika Kufitare e Tre Urave funksionon nga ora 08:00 deri në orën 20:00.

Zvicra

Ministria e Jashtme njoftoi se duke filluar nga data 4 dhjetor, të gjithë personat që hyjnë në Zvicër, duke përfshirë edhe ata që janë vaksinuar ose janë shëruar nga COVID-19, duhet të testohen paraprakisht.

Përveç testimit para mbërritjes, një test i dytë PCR ose antigjenik, duhet të kryhet në hapësirën kohore mes ditës së katërt dhe të shtatë, pas mbërritjes në Zvicër.